Gruponan di interes medico a reuni riba implementacion di inspectie nobo

ORANJESTAD -Gruponan di interes local den cuido, expertonan di KPMG y Minister di Salubridad, dr. Alex Schwengle a topa diamars mainta den un reunion, pa cu e implementacion di e departamento 'Inspectie der Volksgezondheid'.  E meta ta pa e departamento nobo, cuminsa funciona desde dia 1 di januari 2017, Minister Schwengle ta splica. E implementacion lo tuma luga den tres fase. 

SCHWENGLE

Minister Schwengle a splica, cu e ley pa establecimento di inspeccion, a pasa na december 2014 y den e periodo cu a sigui, mester a traha riba e presupuesto, pa por cuminsa duna e departamento nobo, forma y contenido. Despues di deliberacion cu e "oprichtingscommissie", unda cu a bin dilanti, cu como cu tur esunnan envolvi tin otro encargonan, e proyecto aki lo tarda y a dicidi di organisa un destaho entre diferente 'consultant', pa logr'e mas lihe.

KPMG

KPMG a gana e destaho y actualmente, hunto cu e industria di medicina na Aruba, ta definiendo e implementacion pa presenta un "implementatieplan" na maart 2016. Mirando con lihe esaki ta bayendo y e bon cooperacion cu ta ricibiendo for di "veld", tur cos ta mustra cu lo cumpli tambe, cu e fechanan di e meta stipula, segun e mandatario.

BOUW OP DEN TRES FASE NA 2017

Schwengle a expresa, cu e ta hopi contento cu e "veld" ta mira e balor di tin un 'inspectie' y nan ta expresa tambe, cu nan kier tin un bon 'inspectie' na Aruba. Na april/mei por cuminsa implementa e plan y si tur cos bay bon, pa dia 1 di januari 2017, lo cuminsa "bouw op" 'inspectie' den tres fase.

EXPERTISIO DI KPMG

E mandatario a expresa, cu e experiencia cu KPMG y e experto, cu nan a recluta na Hulanda pa e proyecto aki, esta Dr. Wim Schellekens, ta uno bon. Schellekens ta un 'oud-inspecteur van volksgezondheid', kende ta yudando pa 'coach' e proceso; e ta trece experticio cu ne cu no tin na Aruba. Na Aruba tin personanan bon studia, pero nan falta experticio, el a bisa. E experticio aki mester wordo crea na Aruba, y lo uza expertonan externo pa 'build up' expertonan local, Minister Schwengle a remarca.

EZZARD CILIE

Director Pashentenzorg di Dr. Horacio E. Oduber Hospital, Ezzard Cilie ta di opinion, cu e iniciativa ta uno hopi bon, pa cual e "veld" tabatin basta tempo wardando. E no ta un meta riba su mes, pero ta un medio, pa yuda facilita, pa mantene supervision riba calidad di cuido, cu ta wordo duna, Cilie a expresa.

CONTENTO CU INSPECTIE INDEPENDIENTE

Hospital ta hopi contento, cu e iniciativa pa establece un 'inspectie' independiente y ta aporta na e proceso aki tambe, pasobra hospital tin beneficio na dje, segun Cilie, pasobra na final ta logra pa comunidad di Aruba, haya un nivel di calidad di cuido aceptabel, bon y responsabel. E ta mira tambe, un bentaha grandi den e 'consultant' di Hulanda, cu ta un autoridad riba su mes y lo aplica su conocemento y experticio, pa evita cu foutnan cu a wordo cometi na Hulanda, no wordo cometi na Aruba. A conclui bisando, cu e cooperacion cu e otro islanan tambe ta hopi desea, como cu asina entre islanan chikito, hunto cu Hulanda, tin mas forsa.