Polis cu listramento preventivo pa arma na paradanan San Nicolas

Polis cu listramento preventivo pa arma na paradanan San Nicolas

Posted on 1/27/2016, 7:28 PM AST | Updated on 1/27/2016, 9:34 PM AST

ORANJESTAD - Ministerio Publico y Cuerpo Policial di Aruba ta informa, cu polis lo listra preventivamente (preventief fouilleren) riba posesion di arma, durante e ultimo tres paradanan na San Nicolas. E ordo aki, a wordo duna pa Ministerio Publico, despues cu Minister di Husticia, Alto Comisario di Polis y Fiscal Mayor a dicidi pa listra preventivamente, riba posesion di arma, y despues cu Hues Comisario a duna autorisacion pa esaki.

LUGARNAN DI LISTRAMENTO

E accion di listra preventivamente lo tuma lugar riba:

Jouvert Morning. Durante Jouvert Morning riba diasabra 30 di januari 2016 di 2’or di madruga pa 12’or di merdia . Parada di Luz. Durante Parada di Luz riba diahuebs 4 di februari 2016 di 7’or di anochi pa diabierna 5 di februari 2016 pa 7’or di mainta.     Carnaval Grandi di San Nicolas. Durante Carnaval Grandi riba diasabra 6 di februari 2016 di 12’or di merdia pa mey di anochi.

KICO LISTRAMENTO TA ENCERA

Den cuadro, di e accion di listramento preventivo riba posesion di arma, KPA ta autorisa pa stop personanan riba caya, na manera arbitrario y listra hende pa arma na nan paña. KPA ta tambe autorisa, pa listra autonan y otro vehiculonan pa arma. Ademas, KPA ta autorisa pa pidi pa habri cahanan, bahul, tasnan y otro pakinan pa listra pa arma. Ministerio Publico a autorisa KPA pa por haci esaki, Ministerio Publico na su turno, a pidi e autorisacion aki na Hues Comisario, y a hay'e tambe di Hues Comisario.

AREANAN

E area dentro di cual lo listra preventivamente ta encera:

zone 1, bao di cual ta cay Zeewijk, Cura Cabay, Mabon Kavel, Brazil, Rooi Master, Butucu, Weg Seroe Blanco, Weg Fontein, Golfweg, De Vuyst, Fortheuvelstraat, St. Catherinestraat, Mgr. Niewindtstraat, Bernhardstraat, Lagoweg, Grensweg en B.v.d. Veen Zeppenveldtstraat) zone II, bao di cual ta cay Pos Chikito, Spaanslagoen y Mangel Halto, e casnan di pueblo na Pos Chikito (Betonicastraat, Scobillostraat, Maxwellstraat y Ohmstraat) y Sabana Basora, Noord y e casnan di pueblo na Sabana Basora).