Rector Colegio Arubano malo na Hulanda pero no a kit'e

ORANJESTAD – No ta berdad, cu SMOA a kita e actual cabesante di Colegio Arubano, Hans Timmermans for di trabou. Asina e presidente, di hunta di supervision di Stichting Middelbaar Onderwijs Aruba (SMOA), Bart Kool a sigura NoticiaCla.com diaranson merdia. “E ta un rumor. E no ta berdad,” Kool a bisa. Pa varios dia ta coriendo informacion, cu Timmermans no a bolbe Aruba, desde su biahe pa Hulanda na december ultimo. E rumor mas persistente ta, cu e lo a tuma su retiro y/of cu SMOA a dun'e su retiro, aunke no ta bisa e motibo. “Timmermans ta malo,” Kool a confirma na NoticiaCla.com, indicando mesora, cu no ta conoci con largo y serio e enfermedad di e rector actual ta.

PLAN B

“Pasobra no ta previsibel con largo su enfermedad lo dura, a tuma algun medida interno pa por sigura e continuidad di e trabounan na nos scol,” Kool a bisa. Pero mes momento, Kool a desmenti cu lo a retira e cabesante. E cabesante pues ta malo na Hulanda, pero e seriedad di e malesa no ta conoci. E rector a biaha pa Hulanda na december, pa pasa vacacion, y eynan a bira malo. Su ida y mas awor su ausencia extendi, awor ta topico di combersacion na e scol, tanto entre e coleganan maestro, como e alumnonan. Y rapidamente riba rednan social, a cuminsa core e rumor cu a core e cabesante.

RUMORNAN RIBA CAYA

Un di e comentarionan ta cu ‘Colegio ta sin capitan', despues cu Timmermans a bay Hulanda y ainda no a bolbe. Loke tambe ta wordo cuestiona ta, cu mientras cu e no ta na trabou, su salario tambe lo ta coriendo. Anto loke tambe ta molestia esnan na e scol ta, cu Timmermans for di momento cu el a tuma e responsabilidad di rector aña pasa, ta pasando mas tempo na Hulanda enves di na Aruba. Pa aworaki, e informacion oficial pues, ta cu e rector ta malo y cu no ta conoci ki dia e por bolbe y cu a tuma medida pa e scol por continua opera, sin su presencia. Y cu e no a wordo retira di e scol.

TEMPORADA TURBULENTO

For di momento, cu Timmermans a yega Colegio Arubano na mei di aña pasa, e scol a pasa den momentonan turbulento. Sea ta pa motibo di otro, e nomber di Timmermans constantemente tabata den prensa. E resultado malo di examen, tabata e prome contacto cu prensa tabatin cu e rector e tempo ey, recien apunta. Pa varios maestro, Timmermans a haya masha elogio, mientras cu pa otronan e ‘no tabata sirbi’. Despues a bin e situacion, cu un maestro stima di e scol, Alfredo Capello, unda cu aki a bin un impasse serio, cu a conduci te hasta na un accion cortico di alumnonan. Noticianan di menasa cu morto, cu lo a resulta den un chiste, y of interpretacion robez, no a yuda e situacion y aki atrobe Timmermans su nomber tabata wordo menciona constantemente. Hecho ta, cu e rector a haya mas atencion cu a spera, sea si ta na su lugar of no.