HAVA ok cu controle di AZV y DESPA cerca docternan di cas

ORANJESTAD – Entrante otro siman AZV, cu un team di varios departamento manera DESPA y HAVA, lo tene un control di 3 siman cerca tur e 42 doctornan di cas na Aruba. Asina director di AZV, Anko Ringeling a bisa diaranson. E intencion ta, pa mira con e nivel di e operacion di e docternan di cas ta y pa sigura cu e pashentnan ta ricibiendo tur loke nan merece pa ricibi. Presidente di Huisartsen Vereniging Aruba (HAVA) Joaquin van Trigt, no tin problema cu e control aki y ta mas bien yam’e bon bini. “E ta un control cu nos ta welcome,” van Trigt a bisa.

KICO LO WAK

Segun Ringeling, a dicidi pues cu ta un bon idea pa bishita e consultorionan di docternan di cas, pa mira con esaki ta coriendo. Maribel Tromp di DESPA tambe ta forma parti di e team aki, y nan tarea lo ta mas bien, pa analisa e datonan cu nan recohe. “Pa nos interesante ta tambe, ta bon pa wak con cos ta bayendo, kico tin eyfo como praktijken, nan situacionnan y e pashentnan.” Segun Tromp, aña pasa nan a haci un investigacion casi igual bou di e poblacion. Hunto cu esun awor di AZV, lo combina e dos informacionnan, pa tin un miho bista di kico tin cu wordo mehora den mundo di salud publico.

HAVA DISPUESTO PA COOPERA

Pa loke ta e docternan di cas, Joaquin van Trigt a mustra cu nan tarea ta pa asisti e grupo durante e controlnan aki. “Nos kier coopera cu e onderzoek pa mustra cu enberdad nos ta transparente,” Van Trigt a bisa. “Nos tambe sa cu tabatin ruido cu e calidad di cuido medico, tabata bou di un nivel cu nos ta desea. Como tal, esaki ta bon pa nos habri nos porta, pa AZV por haci nan trabou y mira kico por wordo drecha. Nos lo coopera completamente,” van Trigt a sigura tur hende. Y si tin cosnan cu tin cu wordo drecha, lo haci esaki tambe.