Bufete di abogado ta demanda pais Aruba pa debe atrasa

ORANJESTAD – Bufete di abogado Croes Wever Tchong a demanda Gobierno di Aruba, pa debe atrasa di riba 600.000 florin na gasto di abogado. Ta trata di un periodo di entre 2001 y 2009. Segun un 'tussenvonnis' di 20 di januari ultimo, Corte ta kere cu e bufete no ta bay logra cobra e suma habri di 631.104,83 florin. Segun e caso, tabata na november 2009 (ora cu gabinete Mike Eman I a sinta), cu Conseho di Minister a termina e relacion di trabou cu e bufete ‘pa motibonan desconoci’. Un 6 aña despues, e facturanan habri ainda no ta paga. Loke si a sosode ta, cu pais Aruba a ‘verreken’ belasting y primanan habri, cu e cuenta habri cu nan tin cu e bufete.  

CUENTANAN A PASA NAN PERIODO

Pais Aruba den su defensa, a presenta den Corte, cu e suma cu ta wordo cuestiona y cobra, ya caba a ‘verjaar’, o sea pasa tempo, basando nan mes riba e Comptabiliteitsverordening 1989. “Een rechtsvordering ter zake van een geldschuld van het Land verjaart door verloop van twintig maanden na aanvang van het dienstjaar waarin de schuld invorderbaar is.” Esaki ta nifica den traduccion, cu un demanda di debe di pais Aruba, ta vence despues di 20 luna, despues di e aña cu e debe mester wordo cobra. Sinembargo, segun e bufete, pais Aruba no por 'claim verjaring’ pasobra tabata trata di un caso, unda cu tabatin varios ‘verrekening’ entre partidonan y tambe pasobra e intento di usa ‘verjaring’ como motibo, ta asina ‘irasonabel y inhusto’, y den violacion di buena fe, cu huez mester rechasa e demanda ey.

KICO SI POR WORDO COBRA?

Cu e facturanan di e periodo te cu 2008 enberdad a ‘verjaar’, segun Corte enberdad ta determina. Esey no mester wordo paga mas. Pero esey ta diferente, pa e facturanan cu e bufete a manda despues di 1 di januari 2009. Riba e facturanan aki, Gobierno di Aruba mester splica, si pa medio di ‘verrekeningen’ ya ta cumpli, incluso mester duna un bista di e sumanan pendiente. Corte a determina, cu e bufete di abogado CWT por reacciona riba e keho aki. Cualkier otro decision ta pendiente ainda. Lesa e sentencia aki.