Na februari Aruba lo presenta candidato pa gobernador nobo

ORANJESTAD – Pa luna di februari, Gabinete Mike Eman II tin e proposicion cla pa presenta na Conseho di Minister di Reino, pa nombracion di un proximo gobernador di Aruba. Mientras cu e no kier a menciona nomber, Prome Minister Mike Eman a confirma si cu tin un lista di nomber. “Entre nan ta figura politico y no politico,” Eman a bisa solamente. Na luna di mei, e di dos y ultimo termino di e actual Gobernador Fredis Refunjol ta vence. Ta spera cu pa e tempo ey tin un persona nombra caba, cu por tuma e trabou, sino e gobernador interino lo tin cu tuma e posicion por lo pronto.

PROCESO PA NOMBRACION DI GOBERNADOR

Unabes cu Aruba presenta e candidato, ta keda na Gobierno di Reino, pa aproba e nomber aki, pa despues S.M. Rey Willem Alexander huramenta e gobernador nobo. Cu e nombracion aki, Aruba ta haya su di 4 gobernador desde cu el a haya su Status Aparte na 1986. For di e fecha ey, Aruba tabatin Felipe B. Tromp, Olindo Koolman y Fredis Refunjol cu tabatin e posicion prestigioso di ta gobernador di Aruba. Nombernan cu ta wordo menciona, ta hopi pero NoticiaCla.com no por a confirma niun. A acerca algun di e personanan cu ta wordo menciona, pero nan a mustra di no ta na altura di nada y cu ta un sorpresa pa nan. Otronan a simplemente ‘smile’, y no a duna mas reaccion.