Mundo di tennis ta anuncia investigacion contra corupcion

MELBOURNE – E presidentenan di e federacionnan grandi di tennis mundial a anuncia un investigacion den integridad den mundo di tennis y ta yama esaki e Tennis Integrity Unit. Esey nan a laga sa durante un conferencia di prensa na Melbourne, Australia. E asina yama TIU ta bou di scrutinacion pasobra nan lo no a actua suficiente contra e fenomeno ‘match fixing’, o sea regla weganan delanta.

INVESTIGACION INDEPENDIENTE

"Lo bin un investigacion independiente den e enfoke actual y e efectividad di e programa anti corupcion. Lo haci sugerencia pa cambio den e forma di actua," e presidentenan di ATP, ITF y Wimbledon a bisa. “Esaki ta un decision importante. Nos ta priminti pa divulga e resultado completo di e investigacion y haci'e publico,” e presidente di Wimbledon, Philip Brook a bisa.

BBC A RANKA BEL

Tabata un siman y mei atras, cu tanto BBC, como Buzzfeed News a raporta cu den e ultimo 10 aña, como 16 hungador den e top 50, a wordo sospecha un momento of otro di ‘reglamento di wega’. E deportistanan lo a ricibi placa di hendenan cu ta bet placa, pa asina e wega bay un cierto direccion. Ta papia tambe cu lo tin hungadornan envolvi, cu actualmente ta participando den e torneo habri di Australia, cu ta wordo hunga actualmente.

PLACA INVERTI PA BRINGA CORUPCION

"Desde 2008 a inverti 14 miyon dollar pa proteccion di nos deporte. 10 dia pasa a pone duda den nos trabou y nos kier repara e daño aki. Nos lo haci tur cos pa desmenti y bringa e posibel corupcion,” Brook a finalisa bisando.