Marinierskazerne a tene simulacro di pasada di horcan na Aruba

SAVANETA - Den cuadro di bishita di e bapor di marina Hulandes actual na Aruba, Marinierskazerne a tene un simulacro riba tereno di e kazerne na Savaneta diamars atardi. Pa e evento aki, nan a conta cu bishita tambe di Minister di Defensa Hulandes, sra. Jeanine Hennis Plasschaert cu a inspecciona e trabou di esnan envolvi den e simulacro. E vocero di defensa Hulandes pa teritorio di Caribe, Maartje van de Maas a splica cu e biaha aki, e simulacro tabata di un horcan cu a caba pasa riba un pueblo di Aruba. “E mester a refleha e prestacion di ayudo, despues di un pasada di un calamidad, cu ta un di e tareanan principal di marina, cu semper ta presente entre Aruba y Corsou,” vd Maas a splica.

REFLEHO DI UN SIMULACRO

Manera indica caba, e simulacro ta refleha un pueblo unda cu un horcan a caba pasa y a laga un cantidad di daño. E personal di e bapor tin cu presta ayudo na esnan afecta den e pueblo aki, pa e horcan. E hendenan aki ta herida, a perde tur nan pertenencianan, y nan cas. E hendenan no ta contento. Un personal di e bapor ta bay purba yuda e ciudadanonan. E simulacro aki ta sosode 4 biaha pa aña, y cada bes ora cu tin un bapor di marina Hulandes. Gran parti di e personal ta bin tera, pero tin hendenan cu ta keda abordo. Durante e simulacro, ta involucra instancianan Arubano manera bombero, polis y Cruz Cora y tambe Wardacosta. Unabes cu e simulacro aki tuma lugar, e tarea ta pa e prome 12 ora despues di e pasado di un horcan e ciudadanonan ta asisti miho posibel.NOTA: Tur potret ta di actornan cu a participa den e simulacro. Mientras cu e potretnan ta dramatico, nan no ta di un calamidad real.