Presencia Marinierskazerne importante pa Reino Hulandes

ORANJESTAD – Presencia di Marinierskazerne na Aruba ta importante pa Reino Hulandes. Asina e Minister di Defensa Hulandes, sra. Jeanine Hennis Plasschaert a bisa durante su bishita di dos dia na Aruba, den cuadro di orientacion di e trabounan di defensa na e.o. Aruba. Durante su bishita, e mandatario a splica NoticiaCla.com cu el a sostene combersacion cu varios mandatario local manera Premier Eman, Ministernan di Husticia y tambe di Finanzas. Topico sigur tabata e crisis mundial cu a afecta Aruba. Tambe e topico di ‘rechtshandhaving’ di Reino.

BON RELACION ARUBA Y HULANDA RIBA DEFENSA

E mandatario a sigura mes momento tambe, cu ta importante pa tin un bon relacion entre Aruba y Hulanda riba e tereno di defensa y ta mira cu e tarea cu marinierskazerne ta hunga na Aruba, como uno importante y como tal e base lo keda Aruba. “ Marinierskazerne lo keda!” e mandatario a bisa, durante su encuentro cortico cu prensa local. Algo cu tabata un topico algun aña pasa, ora cu a bira conoci cu den cuadro di reduccion di personal y presupuesto, tabatin papia, cu lo mester a cera un cantidad di base militar Hulandes rond mundo, y posiblemente e kazerne na Aruba. Esaki despues a resulta cu no ta asina. Awe e mandatario a reitera e importancia di e kazerne y cu e ta keda na Aruba pa hopi tempo.