Minister Hulandes a sorprende Gobernador cu premio ministerial

ORANJESTAD – Minister di Defensa Hulandes, sra Jeanine Hennis Plasschaert a sorprende su excelencia Gobernador Fredis Refunjol, cu e premio ministerial conoci como e ‘Ereteken voor Verdienste” den oro awe mainta. Gobernador a ricibi, pa su prestacion y sosten den direccion di defensa Hulandes, durante su periodo como gobernador. Hunto cu e entrega di e premio, e mandatario Hulandes a repasa e trabou bunita cu Gobernador Refunjol a haci, y cu a pone cu el a ricibi e honor aki. E premio ta uno ministerial, cu ta data for di 1987 y ta crea pa e Minister di Defensa Hulandes di e tempo ey, Wim van Ekelen.

CRITERIA PA A RICIBI E PREMIO

Gobernador Refunjol a ricibi e premio aki, pa su envolvimento grandi y interes genuino den defensa, dentro di teritorio Caribense, y particularmente Aruba. Mando di Marinierskazerne na Savaneta, semper a sinti nan mes sosteni pa Gobernador. Banda di esey, e manera con el a expresa su mes, riba e presencia militar riba e isla, tabatin un influencia positivo riba e imagen di defensa. Tur esaki a yuda contribui, cu e stabilidad di e region, unda cu e personal di defensa por a conduci su labornan. Como extension di esaki, el a percura pa e integracion di e personal di defensa, cu tabata bin traha aki for di Hulanda hunto cu nan famia. “Señor Refunjol, teniendo cuenta cu esaki, durante e ultimo 12 aña como Gobernador di Aruba, tabatin un parti particularmente valioso y aprecia den e funcionamento y e bienestar di e organisacion di defensa y su personal na Aruba.” Hennis Plasschaert a sigui bisa.