Crisis gabinete Mike Eman soluciona y ta ‘gepasseerd station’

ORANJESTAD – E ‘crisis’ den Gabinete Mike Eman ta ‘gepasseerd station’. Asina Minister Otmar Oduber a declara, e siman aki, riba e situacion cu a surgi ultimo simannan den e seno di e gabinete. Despues cu a reuni den cumbre, cu demas ministernan, e fin di siman aki, tur minister (incluyendo Oduber) a haya otro y a pone cu no tin problema mas. Esey ta nifica, cu e minister su carta di retiro, ta ‘gepasseerd station’, cu ta e mensahe, cu Oduber lo hiba tambe cerca Gobernador di Aruba Fredis Refunjol, e siman aki mes.

ELOGIO PA EMAN

Oduber a bay asina leu, di elogia Prome Minister pa su trabou, cu el a desplega den e fin di siman, pa yega na un solucion. Tur puntonan atendi, lo wordo trata y concretisa den Conseho di Minister e siman aki mes. “Mi ta mas orguyoso cu nunca, di forma parti di e gabinete aki,” Oduber a bisa. Mester bisa si, cu e 9 puntonan cu a wordo poni den un carta pa Gobernador, no a wordo divulga ainda. Durante Reunion Parlamentario awe mainta, varios parlamentario, a pidi pa e puntonan aki bin dilanti y tambe presenta e carta di retiro, cu a wordo presenta cerca Gobernador. Presidente di Parlamento a priminti di lo atende cu esaki. NOTA. E foto ta di Awe Mainta, unda cu por mira Oduber sinta den combersacion cu colega Minister Hooyboer, durante tratamento di reunion di presupuesto.