Luis Oduber mes ta keda Director General di WEB

ORANJESTAD - Despues di a keda nombra como Director Interino di WEB aña pasa, ora cu e director anterior a wordo retira, accionistanan den un reunion extraordinario, a dicidi di nombra Luis H. Oduber, di 50 aña di edad, den funcion di Director General. E nombramento ta drenta na vigor entrante dia 1 di januari 2016. Esaki kiermen cu Oduber mes ta keda awor como director, contrario na su status 'interino'. Oduber tin 15 aña trahando cu e compania caba. 

SPLICACION 

Ta bon pa splica, cu den cuadro di e maneho pa profesionalisa e directiva di WEB Aruba N.V., cu lo percura pa tin un 'Chief Operations Officer' (COO), un 'Chief Financial Officer' (CFO) y un di nan lo ta e 'Chief Executive Officer' (CEO) tambe. Den caso di Luis Oduber, a asigna dos funcion p'e, esta e 'COO' y alabes e 'CEO'. E proceso pa recluta un 'CFO' a caba di cuminsa.

CV DI ODUBER 

Luis Oduber no ta un desconoci den e compania. El a cuminsa traha na WEB Aruba N.V. desde aña 2001 y su funcion tabata 'Sector Manager Onderhoud'. Cu un bon conocemento den tur aspecto tecnico y di mantenemento, e accionista di WEB Aruba N.V., esta Utilities Aruba N.V., ta totalmente convenci, cu e lo por sigui guia e compania na e siguiente nivel di crecemento, desaroyo y di innovacion.