Obama a felicita Aruba cu ‘su independencia’ y dia di Betico

WASHINGTON – Presidente Mericano Barack Obama a felicita Aruba awe cu, su ‘dia di independencia’, na honor di Betico Croes. “Mi ta contento di por ofrece mi miho deseonan pa e ciudadanonan di Aruba na ocasion di e celebracion di e aniversario di nan independencia, un dia na nomber di e estadista y patriotico Betico Croes,” Obama ta bisa den un declaracion. Ta interesante cu e ta yam'e e ‘dia di independencia di Aruba’. E carta a wordo manda pa su Minister di Relacionnan Exterior John Kerry.

LOGRONAN MENCIONA DI ARUBA

Obama (pa medio di Kerry), ta repasa e logronan di Aruba, riba e tereno di energia ‘limpi’ y con el a bira un forsa crucial den Caribe pa cu esaki. Ta haci mencion, cu Aruba tin e parke mas grandi solar den e region, y cu e isla a ‘host’ su di 6 conferencia di energia berde den 2015. Ademas ta haci mencion di otro logronan riba e tereno aki. “Hunto, e pasonan aki ta refleha Aruba su compromiso pa sostenibilidad y pa e logra su meta di bira completamente independiente di combustibel fosil pa 2020."

DEDICACION DI ARUBA

“Aruba su dedicacion pa proteccion di medio ambiente y energia limpi ta acompaña pa e hospitalidad caluroso di su ciudadanonan, cultura rico y e playanan bunita cu ta yama miles di bishitante Mericano bon bini tur aña. Mi ta desea tur Arubiano un aña yena di paz y prosperidad y un dia festivo di celebracion,” e mensahe ta finalisa bisando. Por lesa e mensahe original aki.