Oduber: A logra apertura pero diasabra lo sigui reuni riba e crisis

ORANJESTAD – Enberdad partidonan a haya otro, pero mester concretisa e 9 puntonan den un plan di accion, prome cu por bisa cu cos ta ok atrobe. Asina Minister di Turismo, Otmar Oduber a declara na NoticiaCla.com y NoticiaCla.com merdia, clarificando su situacion mesora. Esey ta nifica cu tin un apertura enberdad riba e problema, y cu diasabra awor durante un reunion cu tur minister, e asunto mester wordo discuti y finalisa, pa por pone un punto final tras di e crisis aki. Mientras cu e punto final no ta poni, Oduber a sigura NoticiaCla.com cu e carta entrega na gobernador, cu e fecha di retiro di 1 di maart, ta keda vigente.

FIRMA NOTA DI PRESUPUESTO

Oduber a clarifica tambe, cu e hecho cu el a firma e nota di presupuesto 2016, no kiermen automaticamente cu tur cos tabata ok atrobe. Si e no firma, e lo a stroba e proceso di gobernacion, cu e mes ta bogando pa tin continuacion. Como tal a firma esaki diahuebs enberdad, pa por cuminsa trata e presupuesto otro siman. Asina e no ta tranca e operacion di e gobernacion y consecuentemente causa mas problema. E ta considera e asunto di a firma un acuerdo di presupuesto, y e apertura di e combersacion diahuebs como dos cos separa di otro.

E 9 PUNTONAN DI DISCUSION

E mandatario ta para ariba cu e 9 puntonan cu e kier claridad ariba, ta keda vigente, y e lo no desvia di esaki niun tiki. El a confirma tambe cu gabinete a acepta e puntonan aki, y ta sigui discuti riba nan den curso di mayan. E no kier a bay asina leu di yama diasabra awor un D Day, pero un dia cu lo tin combersacionnan importante, cu mester trece claridad pa tur hende.

DESAROYONAN NOBO DIAHUEBS

Tabata diahuebs cu varios desaroyo hunto a cuminsa cana, creando e impresion cu e crisis den Gabinete Mike Eman II a pasa pa historia y cu tur cos tabata ok awor. A drenta e nota di gobierno di e presupuesto, firma pa tur minister, cu a crea e impresion cu crisis tabata tras di lomba, mirando cu Oduber a firma e presupuesto. Algo cu el a bisa, cu e lo no a haci si e crisis no tabata soluciona.

COMUNICADO PROME MINISTER

Despues a bin e comunicado di Prome Minister Eman, indicando cu cos ta tras di lomba y cu tin pas y trankilidad atrobe den gobernacion. Esey tabata e declaracion unilateral di e mandatario, cu mesora a crea e pregunta unda e declaracion di Minister Oduber ta, si enberdad tur cos ta ok. Mirando cu esey no a bin, e rumornan contradictorio mesora a cuminsa.

RUMORNAN CONTRADICTORIO

Cosnan a bay dje leu cu ya diabierna mainta, rumornan a cuminsa core cu den seno di Minister Oduber, señal cu cos tabata diferente, a bolter tur cos. A cuminsa core noticia cu ‘ningun momento tabatin acuerdo y cu e declaracion di Prome Minister Eman no tabata corecto'. Merdia sinembargo, durante e programa NoticiaCla.com merdia na Power FM, den un entrevista extenso cu sr.Tito Lacle, Minister Oduber a splica den detaye, kico e situacion tabata y con tur cos a cana, pa kita tur duda. “Ora cu mi a tende tur e rumornan, tabata momento pa bin afo y clarifica tur cos,” Oduber a sigui bisa. Pues, awor tur cos ta mustra cu diasabra awor e reunion final mester tuma lugar, unda cu aki tur minister mester bay di acuerdo y finalisa cu un protocol, cu ta delinea e progreso di e puntonan discuti y un plan di tempo, con pa atende cu nan structuralmente. Asina so, por bisa cu e problema ta tras di lomba y cu tin trankilidad den Gabinete Mike Eman II.