Clientenan di NAGICO no ta perde nan “no claim discount” ora di accidente

ORANJESTAD - Nagico Insurances tanto na nivel Caribense como na Aruba mes, semper a innova cu servicionan y productonan nobo. Despues di tabata e prome compania di seguro, pa introduci servicio di Road Service pa nan clientenan, awor Nagico ta revoluciona e mercado di seguro di Aruba, cu un cambio progresivo den acuerdo cu clientenan. Desde awor, clientenan di seguro di auto cu Nagico, no ta perde nan “no claim discount” ora ta envolvi den un accidente ni mester paga e suma di 150 florin di “eigen risico” ora “claim” riba tercera parti.

DETLEF HOOYBOER

Drs. Detlef Hooyboer, Managing Director di Nagico Insurances na Aruba, Corsou y Boneiro a haci e anuncio diaranson atardi durante un presentacion den Alhambra Ballroom, memey di agente di seguro. Tur a keda impresiona cu e anuncio, cu sin duda lo beneficia clientenan masha y ta revoluciona henter e industria di seguro riba nos isla. Banda di e cambio revolucionario aki, tambe a lansa un campaña di mercadeo unda clientenan real ta conta personalmente di nan experencia sigurando cu Nagico.

EVITA DESAPUNTO

“Nos a yega na e cambio aki, pasobra a nota den e añanan cu clientenan ta keda decepciona despues di paga seguro tanto aña y por ta solamente un biaha a haya un accidente y di biaha prima ta subi pasobra bo "no claim discount" a baha. E mesun desapunto ta nota ora un cliente mester "claim" un accidente, tin biaha ni ta Bo fout, pero esun cu "claim" ta paga e eigen risico. Tin biaha dor cu e partido cu ta fout no ta paga su "eigen risico'"di 150 florin, e "claim" no ta wordo procesa. Kitando e "eigen risico" nos ta "set the tone" den mercado y ta haci cu por procesa claim mas lihe y mas facil,” asina Drs. Detlef Hooyboer a splica. Cu e cambio aki awor, tur cliente di un seguro di auto cu Nagico, tin e mesun bentaha cu no ta perde "no claim discount" ni ta paga e 150 florin si bo causa un accidente.

BON MOMENTO

E anuncio aki di Nagico Insurances a bini net na bon momento, cu automobilistanan ta pagando nan number di auto y como tal ta reglando nan seguro. E pakete di Nagico Insurances definitivamente ta motibo pa evalua un cambio di seguro, pasobra separa di e beneficio cu no ta perde descuento ni paga "eigen risico" di 150 florin ora di accidente, tambe e confiansa cu e compania di seguro a gana den comunidad relaciona cu su servicio unico di Road Services sin duda ta motibo pa forma parti di e famia grandi di Nagico.

ROAD SERVICE

Awor cu Polis a yega na un acuerdo cu companianan di seguro, pa nan mes atende accidentenan simpel, unda cu no tin herido y no tin ningun hecho castigabel cometi, ta mas importante a bira, pa por confia den e servicio exclusivo aki pa clientenan di Nagico Insurances, dor di yama 191. E diferencia ta, cu na Nagico nan mes tin e servicio aki den cas y no mester pasa informacion priva di cliente na otronan.

NAGICO INSURANCE

A funda Nagico Insurances na aña 1982 na Sint Maarten y a crece y penetra den mas cu 20 mercado. Nan ta un di e companianan di seguro mas grandi den Caribe Hulandes, cu mas di US$ 150 miyon na prima y ta ofrece un di e miho seguro di catastrofe den region. Internacionalmente AM Best a “rate” Nagico como un compania solido. Nagico Insurances a sigui crece dor di adkiri British American Insurance Company y awor ta ofrece seguro di bida y medico via e compania Nagico Life. Aki na Aruba e compania a cuminsa na 2004 y a crece rapidamente, specialmente despues cu na aña 2007 nan tabata e prome y unico compania di seguro cu nan mesun servicio di Road Service. Nagico Insurances tin dos oficina na Aruba, un na Savaneta otro den Caya Milio Croes na Dakota.