Team Coca-Cola ta invita clientenan pa traha nan label y T-shirt personalisa

ORANJESTAD - E team di Coca-Cola ta "on the road" cu nan "Share a Coke Tour" pa traha labelnan y T-shirt personalisa pa clientenan, cu ta bishita nan truck durante di nan recorido. E botternan di Coca-Cola di 20 ounce, cu labelnan cu nomber y palabranan di cariño manera "Love" y "Soulmate" ta hopi popular na tur pais, cu nan a wordo introduci. Na Aruba Tropical Bottling Company a hiba e campaña "Share a Coke" un paso mas leu y ta ofreciendo, no solamente labelnan di botter cu e 200 nombernan mas popular na Aruba, incluyendo e 10 nombernan di hende muhe y 10 nombernan di hende homber, pero awo ta regala tur cliente interesa nan propio botter, cu label personalisa pa medio di e "Share a Coke Truck". Ademas, nan a introduci tambe, specialmente pa e temporada di Carnaval, e "Share a Coke" T-shirts personalisa.

BISHITA NA SUPERMERCADONAN

Diabierna y diasabra ultimo, "Share a Coke Tour" a bishita e supermercadonan Mundo Nobo y Rey Hing. Aki, clientenan cu a cumpra un botter di 20 ounce di Coca-Cola, por a bay na e truck pa nan label personalisa gratis, pa haci pedida di nan T-shirt cu nan nomber pa Afl. 25, y reclama nan "selfie stick" gratis, ora nan cumpra dos "packs" di "coca cola products". Team Coca-Cola ta invita henter comunidad di Aruba pa probecha di "Share a Coke Tour", cu ta sigui e siman aki cuminsando diabierna na Chengs na Noord di 1:00pm te cu 6:00pm y diasabra na Cheng Xing for di 9:00am te cu 1:00pm. "Share a Coke Tour" ta bishitando diferente otro supermercado y negoshi rond Aruba, cu e truck durante henter e temporada di Carnaval 2016.

Label Personalisa

Clientenan simplemente mester entrega e botter di 20 ounce di Coke, duna nan nomber of nomber di un ser keri of un palabra di cariño cu nan kier riba e label, y den algun minuut e cliente ta ricibi su botter personalisa gratis.

T-Shirt Personalisa

Clientenan cu ta desea nan "Share a Coke" T-shirt cu nan nomber riba dje of nomber di un ser keri pa dun'e di regalo, por haci nan pedida na e truck y lo ricibi nan T-shirt den algun dia. Cada T-shirt ta costa Afl. 25. Pa esunnan cu ta preparando pa Carnaval of otro festividad y ta cumpra Coca-Cola den cantidad mas grandi, Tropical Bottling Company ta regalando T-shirts personalisa, o sea e T-shirt ta gratis, dependiendo di cuanto e persona of grupo cumpra. Pa 20 paki di producto di cualkier product di Coca-Cola, sea ta bleki of botter di 20 ounce, e cliente ta ricibi 10 T-shirt cu e nombernan individual cu e ta desea riba nan. Pa compra di 40 paki di productonan di Coca-Cola, e cliente ta ricibi 20 T-shirt personalisa, y pa 60 paki, Coca-Cola ta regala e cliente 30 T-shirt.

"Selfie Stick" Gratis

Cu su T-shirt y botternan di Coca-Cola personalisa, Coca-Cola ta trece famia, amigo y coleganan hunto pa crea recuerdo. Ademas di e productonan personalisa, Coca-Cola tambe ta partiendo "selfie sticks" como regalo, durante di e temporada di Carnaval, y asina ta encurasha tur hende pa saca potret, comparti nan cu amigo y famia, pero particularmente pa nan comberti nan momentonan special den recuerdonan cu ta dura pa semper. E "selfie stick" tambe ta obtenibel durante di "Share a Coke Tour" na e truck special. E cliente mester simplemente mustra su recibo di compra di cualkier producto 2 packs di Coca-Cola products y e ta ricibi su selfie stick regalo. Tur informacion encuanto di e tour di "Share a Coke" truck ta disponibel riba e pagina di Facebook, www.facebook.com/CocaColaAruba.

Bo tabata sa?

E top 10 nombernan mas popular inscribi na Censo y Registro Civil di Aruba pa hende homber ta na prome luga: Jorge (325), sigui na di dos luga pa Edwin (235), na di tres luga Ronald y Kevin (215), na di cuater luga Edward (191), na di cinco luga Christopher (185), na di seis luga Roland (177), na di shete luga Angel (167), na di ocho luga Edgar (156), na di nuebe luga Henry, Eric y Andres (154) y na di dies luga ta e nomber Patrick y Joseph (150). E top 10 nombernan mas popular inscribi na Censo y Registro Civil di Aruba pa hende muhe ta na prome luga: Maria (2305), sigui na di dos luga pa Ana (473), na di tres luga Luz (433), na di cuater luga Carmen (428), na di cinco luga Sandra (344), na di seis luga Marie (325), na di shete luga Rosa (299), na di ocho luga Diana (283), na di nuebe luga Gloria (278) y na di dies luga Anna (235).