SMAC: Fin di siman yen di actividad carnavalesco

ORANJESTAD - SMAC ta anuncia un weekend yen di actividad carnavalesco pa grandi y chikito. Diabierna anochi ta toca turno na candidatanan competiendo pa e titulo maximo di Reina di Carnaval 62 y Sra. Carnaval di Carnaval 62. Contando cu participacion di un total di 6 candidata pa cada categoria reparti riba e dos categorianan. Candidatanan ta lo siguiente:

Reina Grandi:

1. Sukienne Copra–TOB

2. Anaisa Orman–EPI

3. Deanna Pinilla – North Fantasy Carnaval Group

Sra. Carnaval:

1. Sra.Veronica Kelly–LiteLife

2. Sra. Candida “ Candy” Maduro – TOB

3. Sra. Jacqueline Quandt – Pleasers and Teasers

Entrada general ta Afl. 15,- obtenibel na cede di SMAC (Weststraat 7) y cerca tur participante y si resta na porta di Aruba Entertainment Center. Portanan lo habri pa 6’or di atardi y nos kier recorda un y tur, pa apoya nan candidate favorita, via e SMS voting di Setar pa e premio di Queen of Setar y Mrs. Carnaval of Setar.

PARADA NOORD Y FESTIVAL DI TUMBA

Diasabra 23 di januari nos ta bai Noord, pa celebra e Parada di Mucha di Noord. Pa 1’or di merdia e parada lo sali for di veld di Bubali y tuma su ruta di semper, cabando pa 5’or di atardi na Centro di Bario Noord. Diasabra anochi SMAC y Comision di Tumba ta presenta e di 46 Festival di Tumba 2016. Tumbanan di caliber halto lo resona na Aruba Entertainment, treciendo ambiente bailabel y carnavalesco pa tur presente. Carchinan ta obtenibel na balor di Afl. 25,- na cede di SMAC y tambe na Valero Essoville, Sta. Cruz y Boulevard. Portanan ta habri pa 6’or y pa 7’or lo tin trekmento di lot pa conoce e secuencia pa e anochi. E festival mes lo cuminsa pa 8’or.

PARADA MUCHA SAN NICOLAS

Diadomingo ta cera e fin di siman cu ambiente sin fin na San Nicolas. Esaki ta e dia di Parada di Mucha di San Nicolas. Parada ta cuminsa 2’or di atardi, saliendo for di Joe Laveist Sport Park. Caminda lo cuminsa cera for di 12’or di merdia. SMAC ta invita pueblo carnavalesco, pa bin San Nicolas pa presencia un bunita parada yen di creatividad y fantasia. SMAC kier corda tur hende pa goza responsablemente, corda proteha contra e solo cayente, uza earplugs pa e muchanan y semper keda bon hidrata.