Flip Flop Festival ta fin di februari proximo riba Eagle Beach

ORANJESTAD – E evento mas grandi riba beach na Aruba “Flip Flop Festival” ta bek y ta tuma lugar diasabra dia 27 di februari proximo riba Eagle Beach. Durante un conferencia di prensa, organisadornan a presenta e line up di e evento, cu un biaha mas ta priminti di bira e evento di beach di aña. Cu un sin fin di artista cu lo presenta durante 12 ora di dia, e ta priminti di bira otro evento epico pa Aruba. E patrocinante mas grandi ta Chill y tur cos ta drey rond di e productonan di e compania Tropical Bottling Company.

LINE-UP

Entre e line up, ta figura artistanan internacional manera Walshy Fire, Gipsian, T.O.K., y DJ Outcast. Localmente artistanan manera NutzBeatz, Buleria y DJ Yeimy lo entretene tur esnan presente pa 12 ora largo. E evento ta cuminsa pa 2’or di merdia y ta termina 2’or di marduga. Lo tin suficiente ambiente, cos di bebe, siguridad y mas. A percura te hasta pa sigura cu e lugar lo keda bon manteni y limpia despues di e evento, den un intento pa conserva nos medio ambiente. Den e dianan cu ta bin, lo tin mas informacion riba e tremendo evento playero aki, esta e edicion 2016 di Aruba Flip Flop Festival.