Croes: No a corta subsidio di ningun fundacion social den presupuesto 2016

ORANJESTAD - Minister di Asuntonan Social Paul Croes, a sigura cu pa e presupuesto 2016, ningun fundacion cu ta resorta bou di su ministerio, a conoce un recorte den su subsidio. “ Al contrario, por te hasta bisa cu algun fundacion ta mas bien bay ricibi mas subsidio, pa asina aloca e personal cu nan tin mester di dje,” e mandatario a bisa den un comunicado manda pa prensa diahuebs atardi.

IMPORTANCIA DI FUNDACIONAN

Segun Croes, na mas cu un ocasion, a pone emfasis riba e trabou importante, cu fundacionnan ta desplega den e sector social di nos pais. "No ta un tarea solamente di Gobierno, pero sigur den esaki nos ta haya un apoyo importante di fundacionnan cu ta traha duro,” asina Minister di Asuntonan Social a comenta, bisando tambe cu e personal y boluntario di e fundacionnan “ta expertonan cu ta dedica nan tempo y energia na ayudo di esnan cu mester di esaki.”

TRINTA FUNDACION TA RICIBI SUBSIDIO

Ministerio di Asuntonan Social tin alrededor di 30 fundacion den nan registro cu ta ricibi subsidio di Gobierno di Aruba. E fundacionnan aki ta complementa e maneho di Gobierno pa locual ta apoyo di sectornan social manera famianan, hobennan y muchanan; como tambe personanan cu limitacion, personanan cu mester di apoyo material y nos grandinan. Croes sigur ta wak, cu tin manera pa traha den un contacto mas estrecho cu e fundacionnan, cu ta resorta bou di su ministerio. E ta un obhetivo, cu e mandatario a bin ta haci, durante e ultimo dos añanan y tin e firme intencion di fortifica ainda. Un trabou eficiente den ekipo, ta esencial pa crea e resultadonan fiha den e maneho social.

NO A CORTA

"Nos no a corta den e fundacionnan subsidio. Basicamente tin te hasta un crecemento di 3% den e subsidio total, pa cu e fundacionnan," Croes a finalisa bisando. Tur directiva, personal y principalmente clientenan di fundacionnan local, por keda trankil, pasobra den 2016 ta bay conoce un continuacion di e facilidad, servicio y productonan valioso pa un miho calidad di bida.