Eman: Contento cu tin union atrobe den su gabinete

ORANJESTAD – Tin trankilidad atrobe den gabinete Mike Eman II awe nochi. Minister President Mike Eman, awe despues di un serie di reunionnan sosteni cu Minister Otmar Oduber, otro ministernan y den seno, hunto ta positivo cu lo tin trankilidad y union den Gobierno pa dedica hunto na futuro di pais, manera cu pueblo a duna e mandato. Eman a splica cu tanto como formado y como Minister President, el a hiba un serie di reunionnan cu Oduber, a coordina tambe encuentronan entre Oduber y otro coleganan cu awe culmina den un ambiente positivo y constructivo. “ Tur hende a scucha otro cu atencion, respet colegial y cu miras riba e trabounan grandi nan dilanti, a pone e base pa hunto sinta den un cumbre den fin di siman aki pa coordina prioridadnan di tur minister pa e añanan nos dilanti,” Eman a bisa.

KITA FALTA DI COMPRONDEMENTO

Eman ta splica cu su tarea tabata, pa yuda kita e falta di comprondemento cu por tabata tin, crea e ambiente di comprension, pa por organisa un cumbre entre e ministernan pa coordina prioridadnan. Awe Eman tabata tin e ultimo encuentro aki hunto cu lider di fraccion di AVP, Rene Herde, Oduber y algun minister. Resultado di tur e encuentronan aki a culmina awe, den un ambiente positivo pa un cumbre constructivo entre ministernan den fin di siman. Eman ta contento cu por a hiba e combersacionnan aki den un bon dialogo, pa por a duna atencion na temanan cu Oduber y diferente minister a pone riba mesa y yega na e punto positivo aki. Despues di e cumbre entre ministernan den fin di siman, ta duna informacion riba palabracion y prioridadnan cu ta keda coordina y palabra den e cumbre.

CONTESTANAN MANDA PA PARLAMENTO

Mientrastanto Gabinete completo, a manda nan contestanan riba Presupuesto 2016 pa Parlamento, pa esaki por wordo trata tambe otro siman.