Bucuti y Tara Beach nombra den top 10 hotel di mundo pa TripAdvisor®

EAGLE BEACH – TripAdvisor® a anuncia e ganadornan di e ‘2016 Travelers’ Choice Awards’ identificando e mihor propiedadnan rond di Mundo. Bucuti & Tara Beach Resort a debuta riba e lista aki di e TOP 10 Mihor Hotelnan rond di Mundo. Bucuti tambe ta ripiti su ‘performance’ e aña aki y tin e honor di ta un biaha mas e Hotel No. 1 den Caribe. Adicionalmente na e honor aki, Bucuti ta wordo reconoci como e Hotel No. 3 den e TOP 25 Hotel cu mihor servicio den Caribe.

GANADORNAN

E ganadornan a wordo basa riba miyones di opinionnan, cu a wordo somete den un periodo di 1 aña door di usuarionan mundialmente di TripAdvisor. Awo den su di 14 aña, ‘Travelers’ Choice Awards’ a reconoce mas di 7000 propiedadnan rond di mundo, cu un lista di 97 pais y 8 region. E seyo di calidad di ganadornan di ‘Travelers’ Choice’ ta encera servicio remarcabel, calidad y e balor cu e propiedad ta ofrece na su clientenan. “Biaheronan considerando nan siguiente biahe, por reserva cu tur siguridad for di e seleccionnan di e ganadornan aki, cu ya a encanta miyones di miembronan di e comunidad di TripAdvisor,” segun Barbara Messing, 'Chief Marketing Officer' di TripAdvisor.

DEDICACION REMARCABEL

“Na momento cu bo ta forma parti na TripAdvisor su lista prestigioso di 'TOP 10 Travelers’ Choice Hotels' mundialmente y ta wordo nombra No. 1 Hotel di Caribe pa di dos aña consecutivo, ta muestra di e dedicacion remarcabel di 'staff' completo di profesionalnan den Hospitalidad na Bucuti & Tara Beach Resort. Esaki ta sigur, un di e mihor aprobacionnan for di nos bishitantenan fiel, pa ken nos ta haci tur nos esfuerso p'e, pa asina nan por tin e mihor experencia vacacional,” tabata palabra di propietario y ambientalista destaca, Sr. Ewald Biemans. “Ta un gran honor pa representa Aruba y Caribe na nivel mundial, danki na nos bishitantenan amabel, cu a somete nan opinion y reaccion na TripAdvisor.”

MAS PREMIO Y GRADICIMENTO

E tres premionan aki di ‘TripAdvisor Travelers’ Choice Awards 2016’ ta e ultimo reconocimento nan pa Bucuti. Adicionalmente, pa wordo reconoci pa su servicio excelente, e resort ta wordo igualmente reconoci pa su esfuersonan den ramo di Sostenibilidad y ta e resort na Aruba, cu e cantidad di Eco-Certificacion mas halto den region. Recientemente, Bucuti a ricibi 'LEED® Silver certification', e unico propiedad den Caribe, cu ta cumpli cu normanan halto di mihor maneho ambiental. Bucuti & Tara Beach Resort ta felicita y gradici tur su empleadonan, pa nan dedicacion y amor cu nan ta inculca den trabounan diario, pa garantisa nos clientenan e mihor servicio y hospitalidad.