Tur minister a firma verslag di presupuesto 2016

ORANJESTAD – E verslag di presupuesto 2016 a drenta Parlamento diahuebs atardi porfin, y cu tur firma di tur minister incluyendo esun di Minister Otmar Oduber. Esaki kiermen cu tratamento di e presupuesto, ta cuminsa diamars awor 9’or, segun Presidente di Parlamento, Marisol Lopez Tromp mes a confirma NoticiaCla.com diahuebs atardi laat. Hunto cu ne, e situacion den Gabinete Eman II tambe a drecha y lo ta 'normal' atrobe. 

DUDA INICIAL

Tabatin duda merdia ainda si e verslag di e presupuesto ta wordo firma pa Minister Otmar Oduber, y cu tanten cu esey no sosode, no por trat'e esaki pues no por schedule esaki pa cuminsa. Sinembargo, tur documento a drenta normal y cu firma di tur minister, cu ta pone cu e presupuesto por wordo trata.

PROBLEMA RESOLVI?

Mientras cu tabatin discusion cu si enberdad e minister a firma, NoticiaCla.com tin e carta den su poder, cu ta mustra claramente cu e firma di e minister ta riba e documento. Cu esey ta bin e siguiente pregunta, cu si e reunion awe entre Ministernan Oduber y Eman a bay den tal direccion, cu cos a keda ‘resolvi’ te cu a firma e documento. Pasobra te cu merdia e situacion tabata cu tanten cu no yega na un acuerdo, esaki lo no a wordo firma. Despues a compronde cu Prome Minister Eman a confirma, cu a resolve e problemanan interno y cu e fin di siman aki lo tin un cumbre entre e mandatarionan. 

DISPUESTO PA CU CONDICIONAN IMPONI

Fuentenan fidedigno a mustra, cu for di ayera lo tabatin acercamento di Prome Minister pa Oduber, indicando cu Oduber lo tin rason den e problema actual y cu e lo ta dispuesto pa ‘bay di acuerdo cu e condicionnan’ cu Oduber a pone pa e gabinete. Oficialmente NoticiaCla.com a haya solamente confirmacion, cu e documento ta firma y cu e reunion ta cuminsa diamars awor. No a tende nada oficial for di Minister Otmar Oduber mes, pero si a compronde pues cu Minister President Eman a bin afo y splica cu cos ta 'ok' atrobe.