Bosman: Si no aproba presupuesto segun criteria CAFT, tin 'aanwijzing'

DEN HAAG – “Aruba tin un presupuesto (aproba) pa 1 februari, cu ta di acuerdo cu e conseho di CAFT, sino e ta haya un instruccion (aanwijzing).” Asina Parlamentario Hulandes Andre Bosman (VVD), a sigura NoticiaCla.com awe mainta. “Bo por ta sigur di esey.” E parlamentario, -conoci pa su critica fuerte riba Aruba-, ta bisa mes momento cu mientras cu esey no ta un hecho y cu no tin garantia ainda, e mes lo haci tur posible pa esey sosode. “Bo por ta sigur di esey.” Bosman a sigui bisa, indicando cu e lo percura pa esey sosode, pa mustra cu ta basta cu promesa y no cumplimento.

CUMPLI CU PALABRACION

Segun Bosman, Conseho di Minister di Reino no por haci otro cu tur e palabracionnan cu ta haci. “E palabracionnan aworaki ta den un stadium cu nan mester wordo ehecuta. Y pa VVD esey ta mas tarda 31 di januari.” E parlamentario Hulandes a mustra cu Gobierno Hulandes y e mayoria den Parlamento mes a percura pa esaki. “Nan por gradici nan mes pa e logro aki,” Bosman a sigui bisa. Pa aworaki, su partido ta vigila e situacion hopi di cerca y ta wak kico ta sosode otro siman.

PRESUPUESTO TA LAAT

Manera ta conoci, e presupuesto ainda no ta trata y awor a compronde cu el a wordo posponi pa otro siman. Di otro banda Presidente di Parlamento Marisol Lopez Tromp, a mustra cu no ta cuestion cu a pospone e reunion pasobra pa e wordo posponi, e mester a wordo yama.” Y e reunion no a wordo yama,” Lopez a bisa. Pero e ta admiti si, cu e tabata riba planning pa tuma lugar diahuebs (awe), pero cu esey no ta continua. Oficialmente Lopez ta bisa cu ta pasobra no a ricibi contestanan di Gobierno, mientras cu tin otro motibo cu tambe ta wordo menciona, manera falta cu un minister ainda no a firma e presupuesto.

DEADLINE DI CAFT

E hecho cu e presupuesto no a wordo trata ainda, ta pone cu e ta yega hopi cerca di e fecha cu Aruba a haya pa keda cla, esta 31 di januari proximo. Si pa e fecha aki e presupuesto no ta aproba segun conseho di CAFT, Aruba por ta den ‘default’ y ta keda na CAFT pa duna conseho riba esaki, sea negativo of positivo. A base di esaki, Bosman a declara awe na NoticiaCla.com, cu fraccion di VVD di Tweede Kamer ta siguiendo esaki hopi di cerca, cu e intencion di corda Gobierno Hulandes, cu no por sigui laga cos pasa sin cu tin consecuencia. Si enberdad VVD y Bosman ta logra, ta otro cos. “Nos lo ta hopi pendiente otro siman,” Bosman a sigura NoticiaCla.com.