DESPA: Ta sospecha cu Zika por a haci su entrada caba na Aruba

ORANJESTAD - DESPA ta sospecha cu Zika por a haci su entrada caba na Aruba, pero pa via cu e virus ta ocasiona sintomanan hopi leve, aunke similar na Dengue y Chikungunya por ta cu e pashent no a wordo getest mes of kisas no a ni bay dokter mes. Un den cinco persona cu hay'e lo berdaderamente sinti molester di e sintomanan di Zika, segun Maribelle Tromp. Mes momento nan ta sigura cu no tin casonan di Zika confirma ainda na Aruba, pero Departamento di Salud Publico ta sigui monitorea di cerca e virus su desaroyo, efectonan y consecuencianan, y con e ta plama di pais pa pais.

BASELINE ESTABLECI

Maribelle Tromp, kende ta epidemiologo na Departamento di Salud Publico ta splica cu a establece un "baseline" pa cu consecuencianan di e malesa aki, sigur pa loke ta trata Microcefalie.

Microcefalie (micro = chikito; cefalie = cabes) ta un condicion di e sistema di nervio central cu ta presenta como un condicion cu bo ta nace cu ne, esta genetico. E cabes di e baby ta chikito y e celebro di e persona ta deficiente den su desaroyo. E condicion aki ta presenta na Aruba y pa medio di establece un "baseline" of "nulpunt" pa cu microcefalie, Departamento di Salud Publico (DESPA) lo tin un miho bista si e condicion aki presenta a consecuencia di Zika.

Zika ta circulando for di februari 2015 y for di november 2015 a confirma su entrada den nos region. Na paisnan di Caribe, Centro y Sur America, pero tambe Merca, tin casonan di Zika. Islanan manera Barbados, Martinique y e parti Frances di Sint Maarten tin caso di Zika.

Na Aruba tabatin shete caso sospechoso y tres a wordo confirma negativo pa medio di test cu a wordo manda pa analisa na Hulanda. DESPA ta pendiente di e testing y resultadonan di e otro cuater personanan, como cu Aruba no tin e capacidad pa analisa e testnan.

DIFERENCIA GRANDI

Un otro diferencia grandi entre Dengue y Chikungunya compara cu Zika, ta cu Zika ta presenta den mayoria caso combina cu "wowitis". Esaki ta e tipo di wowitis cu no tin e pus, pero ta un iritacion di wowo fastioso.

Tromp ta splica cu ta confirma cu un mama na estado por pasa e virus pa su baby cu no a nace ainda, pero e consecuencianan di e situacion aki no ta confirma ainda.

Pa loke ta trata microcefalie, tin e indicacionnan, pero no tin prueba cu esaki ta di berdad loke ta tumando luga. Investigacionnan den esaki ta tumando luga y DESPA ta siguiendo tur desaoryo di cerca, Maribelle Tromp ta confirma.

El a splica cu na Aruba for di januari a haci cambio tambe den e protocol pa test pashent pa cu Zika. Unda cu anteriormente tabata haci e test basa riba indicacion si e persona a biaha pa cualkier di e paisnan unda cu tin Zika presente, actualmente no ta check solamente historia di viahe mas, pero tur pashent cu presenta cu sintomanan, o sea si nan "cuadro clinico" ta pas, ta wordo getest.

For di november 2015, DESPA a cuminsa tambe ta reenforsa e informacion cu nan ta comparti cu comunidad y cu nan stakeholdernan. Tambe nan ta monitor tur desaroyo y e patronchi cu e virus ta plamando hopi di cerca.

Un di e indicacionnan fuerte pa monitor den pashent ta e condicionnan di e sistema nervioso cu ta tipico pa Zika. A reenforsa e "surveillance" riba casonan neurologico pa e motibo aki.

Cu tur e precaucionnan y preparacionnan haci, DESPA ta spera di por determina e desaroyo di Zika na Aruba, cuminsando for di e prome pashent.

Aruba ta traha di cerca cu Pan American Health Association (PAHO), World Health Organization (WHO) y Rijksinstituut voor Volksgezondheid en Milieu (RIVM) di Hulanda y ta pidi dokternan y hospital pa ta hopi atento riba e cuadro medico di pashentnan cu ta inclui keintura, dolor di cabes, rash, dolor di curpa y dolor di spier, cual ta mescos cu Dengue y Chikungunya, como tambe wowitis y e parti neurologico, cual ta tipico pa casonan di Zika.

DESPA ta urgi riba bon diagnostico pa asina por gara e virus aki for di ora presenta e prome casonan.