Director nobo di aeropuerto Reina Beatrix a cuminsa traha

ORANJESTAD – E director nobo di aeropuerto Reina Beatrix di Aruba, James Fazio (mira su foto aki cu minister Oduber), a cuminsa cu su labornan caba. NoticiaCla a haya confirma di su fuentenan na aeropuerto, cu Fazio a cuminsa traha caba prome cu dia 1 di augustus (diabierna awo), y ta den e proceso di familiarisacion di e aeropuerto y e personal. E ta reemplaza e actual director Peter Steinmetz, cu ta retira oficialmente 1 di september proximo. Pero manera informa inicialmente, Steinmetz ta keda e luna di augustus ainda pa ‘werk in’ Fazio y asina percura pa un traspaso suave entre director.

Fazio no ta un desconoci den ramo di maneha aeropuerto. De hecho, e tabatin bou di su encargo un parti importante di e aeropuerto JFK na New York. Specificamente e tabata e COO (Chief Operating Officer) di e terminal internacional IAT. E tabata responsabel pa dirigi e hala 4 na e aeropuerto cual ta den man di Schiphol Group. Ta den e cuadro aki tambe, cu Schiphol Group, cu bou di e contracto cu Aruba tin cu provee un director, Fazio a wordo scohi pa tuma e funcion di director for di Steinmetz.

Algun tempo pasa, Fazio a bishita Aruba y den esaki a reuni cu minister di Transporte responsabel pa nos aeropuerto, Otmar Oduber y tabata acompaña pa Steinmetz. Oduber a sigura NoticiaCla recientemente cu tin dos pa tres persona local awor cu ta den pleno preparacion pa eventualmente tuma e mando over na aeropuerto. Pero segun e mandatario mes a bisa, ‘aki dos pa 3 aña mas nan lo por ta cla pa asumi e carga aki’. Como tal mientrastanto James ‘Jim’ Fazio lo asumi e tarea importante aki.