‘Popeye’: Den cas di Escobar na Miami no tin placa sino cacalaca

MEDELLIN – E ex hefe di sicario di cartel di Medellin, Jhon Jairo Velázquez (conoci como Popeye) a bisa e doño nobo di e cas di su patron (Pablo Emilio Escobar) na Miami, cu no tin placa scondi. Asina e ta reacciona riba e noticia di cazadornan di tesoro, cu tabata en busca di placa diamars ainda prome cu e doño nobo benta e cas abou.

CACALAKA Y DJACA

Segun Popeye, e doño ta bay haya solamente cacalaca y djaca, pero nada di placa. E motibo segun Popeye ta simpel. E cas ey tabata un di e casnan unda cu e famia tabata biba, e ey no ta sconde placa. “Y esey ta un di e casnan unda cu nan tabata biba. Pues no tin placa eyden scondi. Punto."

MODUS OPERANDI

E sicario a confirma cu Escobar tabata sconde placa y arma den e apartamentonan cu e tabatin, unda cu e tabata traha muraya na entrada y ey e tabata sconde nan. Pero unda tin famia, no ta sconde nada. Popeye ta un di e poconan cerca di Escobar, cu a keda na bida y cu actualmente ta liber despues di a sinta su castigo den prison. E tabata e hefe di e sicarionan, o sea matonnan cu tabata percura pa mata tur esnan cu Escobar no tabata kier tin na bida.

BUSKEDA TE AYERA

Buscado di tesoro tabatin te ayera pa haya placa, of un of otro tesoro den loke tabata un di e mansionnan di e narcotraficante Colombiano Pablo Escobar, den añanan 80 na Miami. Escobar cu a muri 22 aña pasa na Colombia, a usa e mansion na Miami como un di su lugarnan di ‘biba’. Mirando cu e mansion lo wordo basha abou ayera, e buscadonan di tesoro tabatin te ayera pa haya algo, si tin algo.

BOTIN SCONDI

Manera ta conoci, Escobar tabata conoci pa sconde botin di placa y joyas den su mansionnan, sea den muraya, bou tera etc. Ora cu a descubri e mansion aki na Miami, a cuminsa e proceso pa busca e posibel ‘tesoro’ di e cas ey, aunke no a logra nada ainda. Segun e raportahe di Merca, e unico cos cu a haya ta un paki cu substancia den un lachi di cushina. E substancia ta parce di ta droga.

CAS CONFISCA Y DOÑONAN NOBO

Doñonan actual di e mansion, e empresario Christian de Berdouare, fundado y gerente general di e cadena di restaurant 'Chicken Kitchen', a cumpra e cas pa 10 miyon dollar na 2014 y ta sospecha cu tin un tesoro den dje. E cas ros, ubica na North Bay Road ta situa riba un tereno di 700 meter cuadra, ta un finca (landgoed). Autoridad Mericano a confisca e cas na 1980, pero a bandona esaki despues.

ENERGIA MALO DI ESCOBAR

Motibo di e posibilidad pa haya placa, ta cu e tabata un practica di no solamente Escobar, sino mas narcotraficante cu hopi placa. Nan tabatin asina hopi placa, cu nan no tabata sa kico pa haci cu ne y of unda pa ward'e. Den un cas na Puerto Rico, a yega di haya cerca di 14 miyon dollar den efectivo. E doñonan (di e cas na Miami)mes kier basha e cas abou, pa core cu e ‘energia negativo’ cu Escobar lo tabata posee. Unabes cu e buskeda caba ayera, lo cuminsa cu e proceso pa basha e cas abou.

.