Corsou y St Maarten tin nan prome caso di virus Zika

WILLEMSTAD /MARIGOT—E prome caso di e virus Zika, a yega tanto Corsou como St Maarten, e parti Frances. Coresponsalnan di NoticiaCla.com na Corsou ta confirma cu Ministerio di Salubridad, Medio Ambiente y Naturalesa ta informa cu a registra oficialmente e prome caso importa di Zika na Corsou. Conforme investigacion ta trata di un persona cu a biaha pa exterior y a keda infecta cu e virus di Zika. E caso importa aki ta confirma. For di esaki nos por asumi cu si tur hende tuma medidanan di precaucion, menos hende lo por keda infecta cu e virus di Zika. Gobierno di Corsou atravez di Epidemologia y Investigacion di departamento di Salubridad Publico (UOG&Gz) ta trahando hunto cu laboratorionan local, docternan di cas (CHV) y specialistanan. Tin instruccionnan delinea ki ora ta manda un pashent laboratorio y cua procedura di test ta keda haci.

ST MAARTEN

Pa loke ta St Maarten, e corant local di e isla riba Daily Herald ta raporta. E autoridad Frances, Agence Regional de Santé (ARS) di Guadeloupe, St. Maarten y St. Barths a confirma esaki pa un laboratorio na Marseilles. Mes momento nan a confirma un otro caso na Guadeloupe. Ta trata di un homber. Pero varios otro isla den region ta hayando esaki tambe. Como tal e instituto Frances di salud publico , L’Insitut de Veille Sanitaire (INVS), a bisa cu ta mas probabel cu e virus aki lo plama hopi lihe den Caribe. E caso di virus di Zika a keda confirma na Guyana Frances y Martinique final di december. Martinique tin 47 caso biologico y 610 caso sospecha.

ZIKA

Zika ta wordo transmiti (mescos cu dengue y chikunguya) pa e sangura di Aedes Egypti. E sintoma sinembargo ta mas suave cu dengue pero e medidanan di precaucion ta mescos cu pa dengue y chikunguya.