Schwengle: No a y lo no firma permiso di hotel pa Ocean Z

ORANJESTAD - E minister responsabel pa firma permiso di hotel, esta Alex Schwengle, no a pone su firma bou di e peticion di e boutique hotel Ocean Z y tampoco lo bay haci’e. Asina e portal di e matutino Bon Dia Aruba, esta Bondia24 ta raporta awe. Segun e portal, Schwengle a mustra cu e peticion enberdad ta riba su lessenaar, pero ‘cu e sentencia di hues, e (permiso) no tin balor mas’. Esey ta nifica cu por lo pronto e boutique hotel lo no haya su permiso, cu ta nifica cu e no por opera toch.

VEREDICTO DI 12 DI JANUARI

E mandatario ta basa su mes riba e sentencia di dia 12 di januari ultimo. “Hues hasta a dicta cu mester cambia e destino bek. Kico mi por haci cu e peticion e ora? Mi por mand’e bek di unda el a bin" e mandatario ta sigui bisa. E mandatario no a keda ey, sino a te hasta critica e procedura general di permiso di hotel, yamando esaki ‘anticua’, y cu ‘tin di mas departamento envolvi’. Segun e mandatario, pa ora e peticion finalmente yega na su lessenaar cu tur conseho positivo, su firma ta bira nada mas cu un formalidad.

ORIGEN DI E PROBLEMA

Segun e mandatario e origen di e problema cu Ocean Z ta, cu nunca a finalisa e parti legal di e plan di destinacion den cuadro di e Ley di Ordenanza Teritorial (aproba na 2007) y e Plan di Maneho Teritorial (ROP) finalisa na 2009. E mandatario ta splica e portal cu e ta kere cu mester un adaptacion ‘pasobra den e plan tin area destina pa zona berde/naturalesa, sinembargo ‘gobierno a duna permiso pa construi’, indicando cu gobierno mes a faya den esaki. E mandatario nunca no a sconde cu varios caminda, ta Gobierno ta esun cu tin e problema cu e.o. burocracia y cu ta p'esey el a drenta politica pa yuda drecha esaki.

E mandatario ademas a mustra cu e ta solamente un persona y cu si tur conseho ta positivo, e ‘no por nenga sin base’.

CONSEHO DI MINISTER

E portal a splica cu a puntra e mandatario si a discuti e problema di Ocean Z den Conseho di Minister, riba cual e mandatario a admiti cu si. “Si, nos a discuti e caso. Pero atrobe, mi ta un minister so,” indicando cu nos no por haci nada.

PROHIBI PA PAPIA

Mientrastanto NoticiaCla.com a busca contacto cu, tanto abogado, como e habitantenan di Malmok envolvi pa tende nan version. Pero rapidamente a compronde cu esaki lo bira un tarea dificil, pa no bisa imposibel. Ora cu a papia cu uno cu tambe tin lugarnan cu e ta huur, el a bisa mesora cu nan tin un ‘gag’ order, esta prohibicion pa papia. No por a bisa di ken nan a haya e prohibicion aki. “Ciudadanonan responsabel no mester papia ora cu tin casonan legal y partidonan den corte,” un di e ciudadanonan a bisa. Ora cu a papia cu e abogado en cuestion Dello Gomez, e comentario tabata igual. “Mi no tin mas comentario te proximo aviso.” Ora cu NoticiaCla.com a insisti pa un comentario, e abogado a mustra cu esaki no ta nada straño. “Corte a duna su veredicto, y partidonan tabatin nan chens pa expresa nan punto di bista respectivamente. Mi no tin mas comentario riba e asunto of asuntonan relata na e topico, te proximo aviso,” Gomez a sigui bisa. A tuma contacto cu e doñonan di Ocean Z, pero e propietario Eva Zissu a prefera di no comenta ainda. Ni Sizzu ni Gobierno no por a confirma di nan banda, si nan ta bay apela nan respectivo sentencia cu tin contra nan.