Situacion entre gabinete cu Minister Otmar Oduber ta pega

ORANJESTAD – Despues di varios dia sin ningun informacion, fuentenan di NoticiaCla.com ta confirmando, cu e deliberacionnan cu y rond Minister Otmar Oduber ta pega. Por lo menos cu no tin combersacionnan cu Oduber tumando lugar y ta pendiente di algun corespondencia, cu mester drenta riba e puntonan di atencion presenta pa Oduber. Loke a compronde ta cu no tin ni pariba ni pabou. E mandatario ainda no a atende ningun reunion di Conseho di Minister despues cu e problema a surgi. E mas serio ta, cu a compronde cu e no ta bay firma e presupuesto tampoco tanten cu no tin un areglo riba su situacion. “E ta para riba su puntonan y aki no tin cambio y ningun partido kier ‘entrega’,” e fuentenan a sigura NoticiaCla.com.

COLEGANAN LO A BOLTER CONTRA ODUBER

A compronde tambe cu e coleganan minister, lo a ‘bolter’ contra nan colega y no ta nada contento cu e situacion cu e colega a hinca nan aden. Y a compronde tambe, cu nan no ta dispuesto pa doblega den e situacion aki y bay na amen di dje, pa complace. Pues e ambiente entre e ministernan y colega Oduber no ta nada bon ‘oficialmente’. Entre algun tin combersacion y entre otronan no. A compronde cu e relacion particularmente entre Oduber y Dowers y Sevinger ta malo, y cu e otronan Oduber tin combersacion.

DISPUESTO PA FIRMA PRESUPUESTO

E parti mas serio ta cu a compronde cu Oduber lo no ta dispuesto pa firma e presupuesto actual, pasobra e no ta di acuerdo cu varios parti di dje. No ta conoci ki consecuencia esaki tin, si Oduber no firma esaki. Un ultimo punto cu ta circula ta, cu e situacion aki tambe ta un di e motibonan pa cual e reunion di presupuesto, cu mester tuma lugar diahuebs, lo no tuma lugar por lo pronto. Algun miembro di Parlamento cu NoticiaCla.com a papia cu ne, a confirma cu e reunion no ta sigui diahuebs mas, pero no cu ta pasobra cu ta pa motibo di e situacion cu Minister Oduber.