Reunion publico pa trata presupuesto 2016 posponi

ORANJESTAD – E reunion pa trata presupuesto 2016 den Parlamento ta posponi por lo pronto. Presidente di Parlamento Marisol Lopez a confirma esaki pa NoticiaCla.com diamars anochi, citando cu ‘oficialmente’ e motibo ta cu Parlamento no a ricibi e contestanan (verslag) di gobierno riba e preguntanan haci pa parlamentarionan. "Tanten cu e relato cu contestanan no drenta, nos no por start cu e 'openbare vergadering', ” Lopez a splica NoticiaCla.com. Inicialmente manera cu Lopez a confirma na e portal aki, e reunionnan tabata programa pa cuminsa diahuebs awor, sigui diabierna y continua otro siman diamars. “Nos a traha un planning berdad cu m'a bespreek cu e lidernan di fraccion,” Lopez a bisa. Esaki awor ta ‘on hold’.

OTRO MOTIBONAN PA CANCELACION

Mientras cu e version ‘oficial’ ta cu e contestanan no a drenta ainda di parti di Gobierno, NoticiaCla.com a compronde cu e motibonan pa cual esaki ‘tambe’ no ta continua y cu de hecho ta mas principal, ta cu Gobierno ta di luto pa morto di consehero di premier Eman, esta Piet Pronk, y e entiero cu ta diabierna awor. Ademas, NoticiaCla.com a compronde cu e problemanan interno di e gabinete, tambe ta afecta e reunion aki. Entre nan, e problema cu un di e ministernan (Otmar Oduber) no kier firma e presupuesto (lesa articulo adhunto) , y e hecho cu Minister di Husticia Arthur Dowers, mester a biaha urgentemente pa Hulanda pa un asunto personal (y ta bek te diasabra).

REACCION DI PARLAMENTARIONAN

Un ronda cu NoticiaCla.com a haci cu algun lider di fraccion y tambe parlamentario, ta saca mas of menos mesun conclusion.” Mi sa cu ta preparando pa e entiero di Piet Pronk y cu minister Dowers ta afo te diasabra. Kisas esey lo cambia e schedule. Pero nada oficial ainda,” Herde a bisa. Lider di fraccion di MEP Evelyn Wever no tabata na altura di un posibel posponemento di e reunion. “Mi no a tende nada ainda,” Wever a bisa. El a keda di tende di algun miembronan di su fraccion pero nada ainda. Pa loke ta vice presidente di Parlamento Chris Dammers, e tambe tabatin su pensamento:” Nos no a haya e nota 'naar aanleiding van het verslag'. Diabierna ta entiero di Piet Pronk. Mi ta kere cu nos ta cuminsa diamars otro siman,” Dammers a bisa NoticiaCla.com.

FECHA NOBO

Pues tur cos ta mustra cu mas sigur, ta te otro siman diamars 26 di januari, e presupuesto lo wordo trata den Parlamento. Esey ta si tur hende ta bek di exterior, y cu e situacion dentro di gabinete Mike Eman II normalisa. No tin indicacion di esey, y no por a haya confirmacion cu pa e fecha ey, cosnan internamente lo mehora y mas aun, normalisa.