Minister mester responsabilisa su mes na Parlamento pa asunto di tereno

ORANJESTAD – Minister di Infrastructura Benny Sevinger, tin cu responsabilisa su mes dilanti Parlamento riba e asunto di dunamento di tereno. Asina fraccion di MEP ta pidi den un carta urgente dirigi na presidente di Parlamento Marisol Lopez Tromp. Motibo di e carta aki ta e caso recien den corte unda cu un boutique hotel na Malmok a wordo prohibi pa opera. E carta ta splica specificamente cu ‘kier claridad riba terenonan na Aruba y e cambio di destinacion di tereno’.

REUNION PUBLICO

Segun e lider di fraccion di MEP Evelyn Wever, nan ta pidi e reunion aki mas lihe posibel y pa e sosode den un forma di reunion publico pasobra ‘den un reunion publico por wordo debati y por presenta mocionnan pa votacion’. Cu esaki, e fraccion kier pa e mandatario responsabilisa su mes riba e tereno aki y pa nan por haya chens pa puntra kico a sosode y mas aun, con esaki por a sosode.

CONFLICTO DI INTERES?

Loke ta haci e caso particular aki interesante, ta cu e propio presidente di Parlamento tabata parti di e caso di e boutique hotel, como un di e demandantenan contra e hotel. Lopez ta un di e habitantenan na Malmok, cu ta sinti cu tabata perhudica pa e operacion di e hotel aki. No ta conoci si mirando e situacion aki, si Lopez mes lo yama e reunion aki y si e yame mes, si e lo presidi esaki of laga vice presidente di Parlamento trata esaki.