Curpa carbonisa ta bek na Aruba pendiente e resultado

ORANJESTAD – Mientras cu e curpa carbonisa di e homber ‘misterioso’ na Franse Pas ta bek na Aruba, su identidad ainda ta un misterio. For di siman pasa, e curpa a bolbe Aruba despues cu e instituto forensico Hulandes NFI a analisa esaki y haci su investigacion. Ora cu a caba cu esey, a manda e curpa bek pa Aruba. E intencion tabata pa e siman aki divulga e identidad di e curpa. Pero segun vocero di Ministerio Publico Ann Angela, awe mainta ainda Ministerio Publico no a ricibi e informacion ey. “E resultado lo yega. Nos ta sperando riba Hulanda,” Angela a bisa NoticiaCla.com awe mainta. Mientrastanto rumornan ta sigui persisti, cu e homber Latino cu a perde coincidentalmente e mesun periodo, lo ta e persona carbonisa.

E CASO

Manera ta conoci, bispo di fin di aña e caso aki a bira conoci di un curpa carbonisa haya den bahul di un auto na Franse Pas. Segun vocero di polis, e prome melding a drenta 6'or di e diahuebs mainta di un auto tipo Chevrolet Celta A-4568, cu tabata na candela na altura di Gold Mine na Franse Pas. Patruya y bomberonan a bay na e sitio y a sigui cu 'nablussen' di e auto. "Despues di esey, esta di e nablussen, personal di takelwagen a bin descubri un body den e auto," Lito Lacle, vocero di polis a confirma na NoticiaCla.com. For di momento cu a descubri e curpa carbonisa, a cuminsa e tramite di identificacion di e curpa pa haya sa e.o. e sexo, y mas importante ken e persona aki ta. No ta prome biaha, cu algo asina ta sosode unda cu ta haya un curpa aleha di ciudad. Foto cortesia 24ora.com .