Buscado di tesoro tin te awe pa haya tesoro di Pablo Escobar na Miami

MIAMI – Buscado di tesoro tin te awe pa haya placa, of un of otro tesoro den loke tabata un di e mansionnan di e narcotraficante Colombiano Pablo Escobar, den añanan 80 na Miami. Escobar cu a muri 22 aña pasa na Colombia, a usa e mansion na Miami como un di su lugarnan di ‘biba’. Mirando cu e mansion lo wordo basha abou awe, e buscadonan di tesoro tin te awe pa haya algo, si tin algo.

BOTIN SCONDI

Manera ta conoci, Escobar tabata conoci pa sconde botin di placa y joyas den su mansionnan, sea den muraya, bou tera etc. Ora cu a descubri e mansion aki na Miami, a cuminsa e proceso pa busca e posibel ‘tesoro’ di e cas ey, aunke no a logra nada ainda. Segun e raportahe di Merca, e unico cos cu a haya ta un paki cu substancia den un lachi di cushina. E substancia ta parse di ta droga.

CAS CONFISCA Y DOÑONAN NOBO

Doñonan actual di e mansion, e empresario Christian de Berdouare, fundado y gerente general di e cadena di restaurant 'Chicken Kitchen', a cumpra e cas pa 10 miyon dollar na 2014 y ta sospecha cu tin un tesoro den dje. E cas ros, ubica na North Bay Road ta situa riba un tereno di 700 meter cuadra, ta un finca (landgoed). Autoridad Mericano a confisca e cas na 1980, pero a bandona esaki despues.

ENERGIA MALO DI ESCOBAR

Motibo di e posibilidad pa haya placa, ta cu e tabata un practica di no solamente Escobar, sino mas narcotraficante cu hopi placa. Nan tabatin asina hopi placa, cu nan no tabata sa kico pa haci cune y of unda pa warde. Den un cas na Puerto Rico, a yega di haya cerca di 14 miyon dollar den efectivo. E doñonan mes kier basha e cas abou, pa core cu e ‘energia negativo’ cu Escobar lo tabata posee. Unabes cu e buskeda caba awe, lo cuminsa cu e proceso pa basha e cas abou.

.