Miss Colombia ta sigura Steve Harvey di lo no demand’e

LOS ANGELES – E presentador y maestro di ceremonia conoci Steve Harvey, awe ta pidi miss Colombia Ariadna Gutierrez pordon awe, pa e fayo garafal cometi durante e ultimo certamen di miss Universo na december ultimo. Den su programa graba awe, e episodio di e despensa lo pasa. Ya caba sinembargo, pidanan a sali publica unda cu por scucha parti di e entrevista tan anticipa caba. Y aki ta keda mustra, cu Gutierrez no tin resentimento pa cu Harvey, y de hecho a pordon'e. Solamente e tabatin un mensahe pe. “Siña lesa bo carchinan miho otro biaha.”

HUMIACION

Un dia despues cu Harvey a entrevista miss Universo mes, e programa mas solicita porta ta esun di awe, ora cu e confronta e miss cu a pasa berguensa y humiacion dilanti biyones di hende. No obstante esaki, Gutierrez no tin resentimento. El a sigura Harvey cu e lo no demand’e tampoco, aunke cu abogadonan a sugeri e paso aki.

SIÑA LESA CARCHI MIHO

No obstante esey, e tabatin un conseho pa Harvey “Bo mester siña lesa con pa lesa bo carchinan,” Gutierrez a bisa den un forma chistoso durante e programa graba, cu ta programa pa keda presenta diamars merdia.

FAYO NA MISS UNIVERSO

Tabata durante e certamen di miss Universo, dia 20 di december ultimo, cu Harvey como maestro di ceremonia a bruha y a anuncia e ganador robez, yamando Gutierrez pa miss Universo y despues coregi esaki pa esun corecto, Pia Wurtzbach, miss Filipinas.

MA KERE CU TA WEGA

“Ora cu bo wak e grabacion, bo ta wak mi ta hari pasobra mi a kere cu bo tabata hasi wega,” Gutierrez a bisa Harvey. “Esey lo tabata e pio joke cu mi a skibi den mi bida,” Harvey a dal bek cune. El a declara den un programa anterior cu e no tabata un intento pa haya mas fama, pasobra e consecuencia di e fayo tabata grandi. “Mi famia a wordo menasa cu morto, mi mester a busca mas seguridad. Keremi, e no tabata un stunt publicitario.”

NO TA DEMANDA

Gutierrez a bisa cu e experiencia tabata manera un pesadia y cu varios abogado a sugeri pa e demanda Harvey y e certamen. “Esey no ta ami. Esey no ta ken mi ta,” Gutierrez a bisa finalmente. Wak e antesala di e programa aki.