Prome Minister hopi conmovi cu perdida di su consehero Piet Pronk

ORANJESTAD – Manera por a spera, Prome Minister Mike Eman, a keda hopi conmovi cu perdida di su consehero y amigo Piet Pronk. NoticiaCla.com a raporta e morto repentido di sr. Pronk anteriormente. "Mi lo haya hopi falta di Piet, tur dia y tur ora di cada dia y cada minuut di tur dia,” Eman ta bisa den un comunicado riba e morto di Pronk. NoticiaCla.com sa cu Pronk tabata practicamente inseparabel di Eman, pa loke ta conseho y sosten den bon y malo. Como tal e morto repentino, a bin como un sla duro pa e prome mandatario. Y den su comunicado, Eman no a sconde esaki tampoco. “Su partida di e mundo aki pa mi te ainda ta algo incomprendibel y irealistico. Su oficina banda di esun di mi ta bashi pa algun siman caba, pero tanto Piet mes como ami a pensa cu un dia e lo ta bek. Esaki tabata su deseo grandi tambe,” Eman ta sigui bisa. “Con por ta posibel cu e homber fuerte, cu semper ta cu mi, banda di mi, mi consehero riba tur tereno, mi confidente den mi momentonan dificil, mi amigo cu un lealtad incondicional, a bay sin bisa ayo. Piet, nunca mi por a pensa cu bo malesa di e ultimo dos lunanan, por a horta bo di mi, di Doina, di tur bo amigo, colega y conocinan, den un habri y cera di wowo. Piet, homber fuerte, cu bos duro, cu un opinion cu nunca ta laga espacio pa duda, un integridad cu no conoce su igual, un trahado te na final, mi amigo cu un trayectoria largo y intachabel, a bay laga nos inconsolabelmente atras," Eman a sigui bisa. Banda di e comunicado hopi personal aki, a publica un otro comunicado mas general unda cu ta papia di e persona su trayecto. No ta conoci ki dia e entierro pa Piet Pronk ta.