Minister a reuni largo cu REPSOL pero ‘no por bisa nada’

ORANJESTAD – Minister di Energia Mike de Meza den un comunicado di prensa, a confirma un biaha mas dialuna cu el a reuni cu REPSOL, pero no por bisa nada sino solamente cu e la bay positivo. “ A sinta basta largo na mesa cu e grupo di REPSOL, unda a bay den detaye riba diferente punto y tur cos ta mustra hopi positivo,” aunke cu tin algun trabou pa haci ainda, e mandatario a splica den e comunicado. E comunicado ta mas interesante pa loke e no ta bisa. Entre otro, fechanan proximo pa continua exploracion manera cu a bisa fin di aña pasa. E dato mas cerca cu e comunicado ta bay riba proximo actividad ta esaki: Den e di dos mita di e aña fiscal, a haci un estudio sismico 3D riba un area di 3.247 KM2, cual despues di a procesa esaki den 2015, lo permiti e compania defini e posibel localidad di e prome survey exploratorio, cu ta planea pa tuma luga e aña’ki. Pues algo planea, pero no tin fecha concreto. Y e unico speransa pa haya gas, ta cu ‘ta hopi positivismo’ cu lo por yega na haya gas, pero ‘ta depende di parti di investigacion’ cu falta ainda.

RIPITICION DI TRABOUNAN ANTERIOR

Loke si e comunicado ta mustra, ta detaye di e acuerdonan cera cu REPSOL, y kico a wordo haci te cu awor. Manera ta conoci, REPSOL a haya e derecho di exploracion riba un area cu ta cubri un superficie di 5.026 km2. Den e prome mita di 2014 e companianan Total (35%) y BG (30%) a drenta den e proyecto offshore aki, den cual REPSOL ta e “operating company”. E blok Aruba PSC, cu un area di 14,360 km2, a wordo otorga na REPSOL na 2012 cu 100% di share. E contracto ta inclui exploracion pa un periodo di ocho aña dividi den cuatro fase. Tanto REPSOL como Minister Mike de Meza a expresa hopi positivismo cu lo por yega na haya gas, y suficiente pa exploracion. Pero tur resultado ta depende di e parti di investigacion cu mester tuma luga e aña’ki ainda.