Marlon Sneek: Contracto di Angel Bermudez a cancela ora a bira minister

ORANJESTAD – Angel Bermudez como persona cu a reemplaza Juan David Yrausquin como ministetr, ta goza di sosten di fraccion y partido completo di partido AVP. Esaki ta segun parlamentario di e partido berde Marlon Sneek den un declaracion diahuebs mainta. E la haya ta necesario pa defende Bermudez contra declaracionnan di partido MEP e siman aki, cu a sali contra di e nombracion aki (wak comunicado di MEP aki). Sneek a splica e aspecto di e contract supuesto di Bermudez como consehero di Yrausquin, su proceso di screening y pakico no a scohe otro persona den partido mes.

E prome keho di partido MEP, segun Sneek, ta cu no por a haya ningun persona den partido mes pa haci e trabou di minister. Segun Sneek, a opta pa tin un vakminister. Esaki segun e liña di maneho riba finanzas publico. “Mester di cada un di e integrantenan cu bo tin awe den gabinete di gobierno. Mester tin un hende full time den dje” Sneek ta cuminsa bisa. No ta kere cu por a pone cualkier minister atende cu e caso aki. Tambe pa loke ta parlamento, mester a keda manera cu e ta pasobra ta importante pa tin hendenan cualifica den parlamento cu ta capaz pa hiba bon debate. Cu esaki Sneek ta mustra cu no por a saca ningun di esnan den parlamento awor, pa pone como minister.

Tambe ora cu NoticiaCla a puntra riba e cualidad di esnan den partido, y si nan no tin e capacidad, Sneek a sigura NoticiaCla cu tur hende den partido tin e capacidad y ta cualifica. E no ta bisa cu nan no ta cualifica pero mester di un persona cu mester domina e materia 100%. Bisando esaki atrobe, Sneek tambe ta sigura cu no ta cu no tin ningun hende den partido cu no ta domina e cartera. “Sigur cu nan ta domina e cartera, pero e ta un topico cu ta hopi importante” Sneek a bisa NoticiaCla.

Pa loke ta e aspecto di screening, partido MEP tambe a referi na e proceso cu no tabata manera cu mester ta. Segun Sneek, e ley di 2012 na Corsou (un LV art 2) ta splica tur loke mester a wordo haci. (lesa e documento aki) unda entre otro e kabinets formateur ta haci e onderzoek. Y si gobernador a firma e lb, ta mustra cu esaki ta bon. “Gobernador no ta firma si esaki no ta bon” Sneek a bisa.

Finalmente, Sneek ta sigura cu segun ley, asina cu Angel Bermudez a bira minister, su cotnracto anterior como consehero principal di Juan David Yrausquin, a vence. Ta trata cu un minister no por tin ‘neven inkomen’. “Esey kier men cu automaticamente e contract aki ta cay na awa. Gobierno no por firma un contract cu un minister y e minister tin un salario di minister” Sneek a bisa. Mes momento e la reta lider di partido MEP, Evelyn Wever, pa mustra cu e no tin ningun clase di entrada extra banda di su salario como parlamentario.