Ex conrector di Colegio Arubano Piet Pronk a bay sosega

ORANJESTAD – Ex conrector di Colegio Arubano, Piet Pronk a fayece diadomingo anochi laat na hospital Horacio Oduber pa complicacion di pulmon. Pronk (74) den su ultimo funcion te na su morto, tabata consehero principal di Prome Minister actual, Mike Eman, cual funcion el a carga for di momento di e prome gabinete Mike Eman. Pero pa hopi, Pronk tabata mas conoci pa su labornan como docente y despues conrector di Colegio Arubano. Momento cu e noticia di su morto a plama, tabata ex alumnonan mas tanto cu a cuminsa manda palabra di condolencia den su direccion.

CARERA DI PRONK

Pronk a yega Aruba na añanan 70 y a cuminsa su labor na Colegio Arubano como docente di wiskunde y natuurkunde. Na 1975 el a integra den e maneho di scol, unda cu el a fungi te 1987 como conrector den periodo di Richard Harms (e.f.m) y Dolf Hoevertz. Den e periodo ey el a studia entre otro ley y a produci varios documento riba staatsinrichting di Aruba. Despues di su pensioen, el a funda Universidad di Aruba cu e facultad di derecho (ley). E tabata activo tambe den sindicalismo y como tal den sindicato SIMAR. Manera ya informa, na final di su carera el a acepta e reto di bira e director di gabinete Mike Eman y tambe a fungi como su consehero principal. Piet Pronk ta laga atras su señora Tini, yiunan Kitty, Annemarie y Yolanda. Cu Piet Pronk sosega na paz. Potretnan na blanco cu preto ta cortesia di Evert Bongers.