Gobernador Refunjol como patron di Cruz Cora a inaugura e edificio nobo

ORANJESTAD – Ocho aña despues cu a haya e meta pa traha e facilidad, y dos luna despues cu el a keda entrega oficialmente, gobernador di Aruba Fredis Refunjol a inaugura e edificio nobo di Cruz Cora na Dakota. Un logro sigur si mira cuanto cos mester a pasa aden pa por a logra esaki segun e director Michel La Haye a splica na momento di e inauguracion. Gobernador Refunjol ta e patron di Cruz Cora di Aruba y como tal e persona cardinal pa efectua e inauguracion.

SUFICIENTE ESPACIO

Cu e adkisicion di e edificio aki, Cruz Cora ta libera di tur material y mas cu tabata incapacita entre otro e shelter, cu pa hopi aña a fungi pa 50% como bergplaats di material. Pa no papia mes di tur otro caminda cu mester a warda material tur e tempo aki debi na falta di espacio. Cu e adkisicion di e edificio aki, e shelter ta keda un shelter, y tin suficiente espacio pa den un solo lugar almacena tur ekipo, incluyendo vehiculonan di e instancia asina importante manera Cruz Cora.

INAUGURACION

Gobernador Refunjol como patron di Cruz Cora a efectua e apertura cu e acostumbrado cortamento di cinta, y tambe devela un borchi cu ta desplega tur esnan cu ta patrocina e instancia aki durante ultimo añanan. Un atardi ameno sigur cu tabata bon atendi pa esnan presente.