Jerry Staring ta e hefe nobo di Departamento di Salud Publico

ORANJESTAD – E siman aki Gobierno lo anuncia nan decision pa e persona cu ta bira e proximo director di Directie Volksgezondheid (DVG). Ta trata di sr.Jerry Staring, cu pa un tempo caba ta envolvi den cierto parti di maneho di DVG. Pero aworaki e decision a cay cu Staring ta haya su nombracion. Mientras cu anteriormente e ley tabata poni pa e persona ta e.o. un medico, pero e ley a keda adapta di tal forma cu esey no ta necesario mas. Esey ta pone cu Staring, cu no ta medico sino un verpleegkundige di profesion, por a haya e funcion aki. Actualmente Staring ta consehero di maneho di salud pa Gobierno di Aruba, osea beleidsadviseur.

ANUNCIO PARCIAL

Tabata durante e anuncio di Gobierno di e traspaso di e LandsLab pa hospital, cu e mandatario di Salud a sigura cu e anuncio oficial lo bin probablemente e siman aki. Sinembargo, ya caba e noticia ta coriendo den e departamento y fuentenan fidedigno, a confirma pa NoticiaCla.com, cu Staring ta e persona cu a haya e confiansa di Gobierno y Minister di Salubridad pa asumi e tarea importante aki. E mandatario na e ocasion ey (traspaso di laboratorio) a bisa, cu e persona no ta un director durante ora di trabou so, sino 24 ora pa dia. Y e mester ta un persona cu por maneha un departamento asina importante, cu ta bin cu un sin fin di responsabilidad.

MANAGEMENT TEAM

Pa un tempo caba, DVG ta wordo maneha pa un management team, cu personanan manera Wilmer Salazar y Staring mes tambe tabata na cabes di esaki. Ki dia exacto e anuncio lo wordo haci, no ta conoci ainda pero a compronde cu esey lo ta e siman aki.

CURICULO

Staring a traha como verpleegkundige na e departamento psyciatrico di Aruba, tambe tabata miembro di bestuur di Wit Gele Kruis, y pa e ultimo dos añanan ta consehero di Gobierno riba tereno di salud. El a caba su bachelor di verpleegkundige na Hogeschool van Arnhem na 2001, y a haya su masters na Universidad di Aruba na 2011.