E siman aki Parlamento ta cuminsa trata presupuesto 2016

ORANJESTAD – Presupuesto di gobierno di Aruba ta riba agenda pa wordo trata diahuebs awor, 21 di januari. Presidente di Parlamento Marisol Lopez Tromp a confirma esey pa NoticiaCla.com den fin di siman. E idea ta pa e tratamento cuminsa diahuebs awor, sigui diabierna, dialuna y posiblemente caba den careda di diaranson. Dialuna ta un dia liber (Dia di Betico). “Nos ta tene efectivo y (lo) cabe prome cu fin di januari,” Lopez a sigura e portal aki. Y e intencion ta pa tur minister ta presente, segun Lopez.

SITUACION DI GABINTE MIKE EMAN II

E tratamento lo ta sigur uno interesante, mirando e situacion actual cu tin den gabinete Mike Eman II, unda cu no ta sigur kico e futuro di un di e ministernan ta y lo bay ta. Manera cu Lopez a bisa, e ‘intencion’ ta pa tur minister t'ey hunto’. Un di e motibonan ta cu e (presupuesto) ta wordo trata como un solo ley y no per minister. Ta netamente esaki ta pone cu e ta bira algo interesante, mirando cu NoticiaCla.com tin informacion cu e minister cu aworaki ta ‘ausente’, Otmar Oduber, lo no tabata mucho pro cu cierto aspecto di e presupuesto.

SIN SOLUCION NA HORIZONTE

Te cu diabierna pasa, e problema no tabatin solucion y no tabata mira un solucion ‘a corto plazo’. Sinembargo e holoshi ta sigui cana mirando cu den apenas 4 dia, tur minister mester ta presente den Parlamento pa trata e presupuesto. Y ainda (oficialmente) no a bin un señal for di Gobierno, cu Oduber lo ‘reintegra’ den e gabinete di tal forma, cu e lo presenta pa diahuebs awor pa e tratamento di presupuesto.

RETONAN DI E PRESUPUESTO

Pa loke ta e presupuesto mes, esaki riba su mes tambe tin un reto, mirando cu ‘un biaha mas’ e no ta conta cu aprobacion di e colegio Arubano di supervision financiero y e organo consultativo RvA. Den Parlamento mes (manera custumber) tin un division unda cu fraccion di gobierno ta contento cu e contenido, mientras cu oposicion (MEP) ta mustra cu e gastonan ta exorbitantemente halto. Y finalmente, e presion di tempo tambe ta hungando un rol, mirando cu a duna Parlamento te fin di januari pa finalisa e presupuesto. Ta mira te awor cu Parlamento lo logra keda cla cu e tratamento na tempo, y aproba esaki. Pregunta ta keda cu si unabes e keda aproba, si e colegio Arubano di supervision financiero y RvA ta aproba su contenido final, of ta pidi un revision di esaki.