Reunion entre gobierno cu CITGO ta continua dialuna na Aruba

ORANJESTAD – Trabou no ta stop ya cu diasabra ultimo un delegacion di CITGO a yega Aruba pa atende reunionnan importante dialuna. Ta bay sinta na mesa hunto cu delegacion di Gobierno pa traha riba e ultimo detayenan di e 'Definite Participation Agreement (DPA)'. Minister di Energia Mike de Meza a splica, cu mientras e parti ey di e negociacionnan ta tumando luga, tin varios otro proceso cu canando simultaneamente. Un ehempel ta e negociacion cu Valero, como tambe e leynan cu tin cu bay Parlamento, caminda Gobierno ta establece un compania estatal, cu ta doño di tur e propiedadnan di e refineria y ta esun cu ta cera un acuerdo cu CITGO y Valero.

INTERES DI CITGO

Interes di CITGO pa bira operador di refineria na San Nicolas ta keda sumamente halto, segun Minister de Meza. Durante e ultimo reunionnan sosteni, a acorda rapidamente riba mayoria punto cu a toca, mientras cu riba otronan ta deliberando y mester di mas tempo atencion. “Nos ta premira cu e dos luna y mey aki lo ta hopi druk cu trabou,” asina Minister de Meza a indica. “Mester discuti puntonan hopi compleho, pero na final lo ta hopi satisfactorio Aruba.” Manera NoticiaCla.com a raporta caba den fin di siman, e mandatario a bolbe Aruba diabierna for di su bishita na Houston, unda cu el a sostene e reunionnan necesario cu e compania CITGO.