Propietario Laboratorio Familiar ta desaproba di insinuacion di minister

ORANJESTAD – Si Minister di Salud, Alex Schwengle ta di opinion cu ‘varios’ laboratorio priva no ta acredita manera debe ser, ta na su lugar pa minister atende esaki cu e laboratorionan cu e kiermen y no insinua publicamente, cu lo ta pasobra e laboratorio ta paga pa haya su acreditacion (“wie betaalt, bepaalt”). Asina propietario di Laboratorio Familiar, Irene vd Linde a reacciona. Usando palabra manera ‘asombro y tristesa’ ta con e propietario di Laboratorio Familiar ta sinti di e asunto di acreditacion, manera cu a keda publica inicialmente den NoticiaCla.com di siman pasa. Na e ocasion ey, Minister di Salubridad, Alex Schwengle a splica e portal aki di su desaprobacion di e forma con ‘laboratorionan na Aruba’ ta acredita y cu e mester ta miho. Esaki no a cay den bon tera serca propietario di e 6 laboratorionan priva cu e ta maneha.

COMENTARIO DI SU TRAHADONAN

“Mi a tende ayera di mi 2 empleadonan, cu a atende e invitacion di e apertura oficial na Hospital di Fundacion Servicio Medico Aruba, conoci como Landslaboratorium, y tambe lesando awe mainta den e diferente corantnan locual minister di salud Alex Schwengle a bisa na e apertura,” vd Linde a bisa. Segun vd Linde, durante e ceremonia aki, cu e ta considera un evento bunita y tambe importante celebrando cosnan nobo y cambionan positivo den e sector di medicina na Aruba, e minister a vocifera su falta di impresion y su desconfiansa den e laboratorionan medico den sector priva na Aruba. “ Incluyendo asina mi Laboratorio, dilanti tantisimo profesionalnan cu ta trahando den e mundo di medicina y di mi dos empleadonan cu tabata presente cu a sinti nan cu hopi berguensa. Minister Schwengle a laga sa cu e no ta confia den e acreditacion di I.L. Laboratorio Familiar N.V. y a insinua cu “wie betaalt bepaalt”. Bisando asina e ta trece duda den calidad di nos servicio,” vd Linde a sigui bisa.

ACREDITACION

Segun e doño, e aña aki na maart 2016, I.L. Laboratorio Familiar N.V. ta celebrando su 30 aña di existencia na Aruba, di un propietario Arubiano y ta haci hopi dolor, ora e tende cu nos mesun hende local ta purba di papia asina di nos laboratorio, cu nan a traha asina duro pa garantisa testnan confiabel, di calidad y na un nivel mas halto cu ta posibel.  

“ Na aña 2004 nos a wordo informa door di AZV cu pa sigui traha cu AZV nos mester haya acreditacion di ISO 15189. Nos laboratorio a traha cu alma y cuerpo 4 anda masha duro mes, y haya training di profesionalnan di diferente pais, te cu nos a logra di wordo acredita na aña 2008 door di e organisacion Norte Americano A2LA (American Association for Laboratory Accreditation) cu ta trahando bow di maneho di ILAC (International Laboratory Accreditation Cooperation),” vd Linde a sigui bisa.

ILAC

ILAC ta e organisacion internacional, cu ta maneha tur e companianan di acreditacion cu ta acredita tur e laboratorionan medico na mundo, cu ta e ISO 15189 (e maximo nivel di acreditacion di laboratorio na mundo). E organisacion international aki ta uno hopi serio y estricto y hamas y nunca lo acepta un bribe di ningun laboratorio medico.

A2LA ta e compania di acreditacion cu ta situa na Maryland, USA, y tin como Principio y Valornan: Integridad Inflexibel, Imparcialidad, Independencia y Objetividad, Credibilidad, Confiansa y Respet pa Dignidad. “ E compania aki hamas y nunca tampoco lo tribi di acepta ningun tipo di bribe,” segun vd Linde, e personalmente no a wordo lanta asina tampoco. “ Ami no ta kere cu nos Arubiano tin e cultura ey, di bribe hende pa logra algo cu placa. Mi a sinti mi mes hopi insulta y tristo pasobra mi lo tabata desea pa nos Minister di Salubridad lo por a apoya nos como Arubiano, cu a traha hopi duro durante 30 aña pa nos laboratorio duna e mihor servicio posibel na nos hendenan local y tambe pa ta e prome Laboratorio den e hemisferio oeste pa a recibi e acreditacion aki di A2LA. Nos na Laboratorio Familiar si ta hopi orguyoso di e logro aki,” e doño di e laboratorionan a bisa.

OPINION DI SCHWENGLE

“Si Minister Schwengle ta di opinion cu ‘varios’ laboratorio priva no ta acredita manera debe ser, ta na su lugar pa minister atende esaki cu e laboratorionan cu e kiermen y no insinua publicamente cu lo ta pasobra e laboratorio ta paga pa haya su acreditacion (“wie betaalt, bepaalt”). Di e forma aki minister ta falta respet pa e laboratorionan na Aruba cu ta acredita debidamente."

APRECIO

"Mi kier a tuma e oportunidad aki tambe pa hasi conoci e aprecio cu mi tin pa mi patientnan, e doctornan, e specialistanan y tur e companianan cu semper a confia nos. Mi ta manda un palabra di gradicimento na tur di boso pa boso confiansa y apoyo na I.L. Laboratorio Familiar N.V. durante e 30 añanan. Nos lo semper hasi nos best pa brinda bosonan e mihor servicio posibel."

FELICITACION

Van der Linde a brinda su mas sincero felicitacion na Fundacion Servicio Medico Aruba (Lands laboratorium) pa nan comienso nobo y cu kende porcierto nan semper a tin un bon relacion di trabou hunto. "Mi ta desea e Management y Personal di e fundacion aki hopi boluntad y exito pa logra tur nan metanan. Mi ta spera cu nos por sigui traha hunto den e sector di Medicina na Aruba, manera un famia grandi pa nos hendenan cu ta biba aki”, vd Linde a finalisa bisando.