Merca cu alerta pa Caribe y Latino America contra virus Zika

ATLANTA – E centro pa control y prevencion di malesa na Merca CDC a emiti un alerta di biahe pa Mericanonan na estado cu ta biaha pa paisnan manera Mexico, Puerto Rico, Venezuela y otro paisnan di Caribe, Centro y Latino America debi na e presencia di e virus Zika. E alerta a bin despues cu a haya prueba cu e Zika a wordo haya den tejido di baby recien naci brasilero, afecta cu microcephaly. E agencia a bisa cu estudionan extra ta necesario.

LISTA DI ADVERTENCIA

E lista advertencia ta inclui Brazil, Colombia, El Salvador, Guiana Frances, Guatemala, Haiti, Honduras, Martinique, Mexico, Panama, Paraguay, Suriname, Venezuela y Puerto Rico.

"Pa un abundancia di cautela, damanan na estado ta wordo avisa pa considera pospone nan biahe pa e area unda cu Zika ta presente,” e agencia a bisa.

DAMA MERICANO A CANCELA BIAHE PA ARUBA

Despues di a tende di e virus aki, Christine Arce-Yee a cancela su biahe pa Aruba, cu el a yama un babymoon, e periodo final prome cu nacemento di su prome baby. “Mi ta 14 siman na estado,” Arce Yee a bisa CBS news. “Mi no ta kere mamanan lo kier tuma e chens ey!"

CONSEHO DI CDC

CDC ta sugeri damanan na estado cu tin cu biaha pa papia cu nan medico prome cu nan biaha y sigui pasonan pa preveni mordi di muskita. Damanan cu ta purbando di sali na estado tambe mester consulta nan docter.

CASONAN NA ECUADOR

Ecuador a raporta 4 caso, pero e personanan aki a bolbe e pais di areanan afecta pafo di Ecuador. Pero e minister di salud di e pais a anuncia 2 caso extra diabierna. Y esun afecta no a bandona e pais.