Ministerio Publico ta keha abogado di Dos Santos y Jamaloodin

WILLEMSTAD - Ministerio Publico Corsou a entrega dia 31 di juli 2014 un keho serca Conseho di Supervision (Raad van Toezicht) i Deken di Orden di Abogado contra abogado Chester Peterson di e bufete di abogado Sulvaran & Peterson.

E keho tin di haber cu e comunicado pa prensa cu mr. Peterson a emiti e siman aki den cuadro di e investigacion Maximus. Mr. Peterson a cita informacion for di e dossier den e comunicado sin cu e tabata autorisá pa hasi esaki.

Mr. Peterson ta abogado di G.R.M.J. Fiskal di Ministerio Públiko a entregá e sospechoso G.R.M.J. un orden cu medidanan restriktivo. E orden ta buta cu e sospechoso no mag drenta den contacto cu otro hende pa di e forma aki e no comunica cu terser parti tocante e caso penal. E meta di e orden di medidanan restrektivo ta pa evita cu e investigacion ta ser strobá i pa evita cu sospechosonan por sincronisá nan declaracion. Esaki yama “collusie gevaar”.

Un sospechoso por papia si cu su abogado. Esei ta un derecho di principio cu e sospechoso tin pa e por haña un defense decente. Un abogado ta mará di e mesun manera cu su cliente na e orden di medidanan restriktivo. E no por i e no mag papia tocante e caso cu terser parti, incluso su coleganan di su propio oficina. Mr. Peterson tabata na altura di e orden di medidanan restriktivo.

Na opinion di Ministerio Publico, sr. Peterson a tratá di influenciá e investigacion dor di emiti e comunicado.

Mr.Peterson a duna den su comunicado tambe comentario al respecto di e credibilidad i confiabilidad di testigonan. Expression di opinionnan asina ta na su luga den sala di Corte i no den prensa. Ta na hues pa husga den un caso penal si e ta duna credibilidad na un declaracion.

Finalmente sr. Peterson a hasi mencion den su comunicado di nomber completo di testigonan i a duna nan declaracion tambe un huicio di balor. Dor di actua asina a causa conscientemente daño na nan. Daño na hende cu tabata dispuesto pa yuda pa haña berdad den e investigacion di morto di Helmin Wiels. E no ta na su luga den un estado di derecho pa uza metodonan asina.

Ministerio Publico lo studia keda bes atrobe ora declaracionnan surpasá e frontera di decencia. Ora resulta cu ta tratá di un echo castigabel lo actua contra esaki. Naturalmente lo presenta e casonan aki na huicio di Corte.