Total di 17 cantante y 10 banda inscribi pa Tumba di Aruba

ORANJESTAD – Un total di 17 cantante y 10 banda a registra e aña aki pa Festival di Tumba 46. Diasabra, na cede di SMAC, Comision di Tumba Festival a ricibi tur esnan cu lo competi pa bira Rey of Reina di Tumba pa Carnaval 62. Varios participante a haci un entrada special, sea cu parada of musica of algo diferente. Segun SMAC, un bon ambiente tabata reina bou di tur musico durante e anochi di inscripcion y e festival ta mustra di bai bira un espectaculo musical di caliber halto.

DEDICACION

E aña aki Tumba Festival lo duna homenahe na sr. Robert Maduro, conoci pa su añanan di dedicacion na musica folklore y participacion na Festival di Tumba. Tambe Sr. Eric “Bubu” Rafael, lo haña un homenahe pa su contribucion como musico pa hopi aña.

CARCHINAN

Desde dialuna 18 di januari, carchinan na balor di Afl. 25,- lo ta obtenibel na cede di SMAC, situa na Weststraat 7. SMAC, Comision di Tumba Festival y tur participante, kier extende nan invitacion na pueblo di Aruba y amantenan di Tumba en particular, pa asisti diasabra 23 di januari, den Aruba Entertainment Center. Ademas di bon ambiente musical, lo bai tin cushina y bar bon surti.

PETICION

Ta pidi participantenan pa yega trempan na Aruba Entertainment Center, pa asina conoce e secuencia di bandanan, cu lo bira conoci e anochi ey. Manera ta costumber, e trekmento di lot lo tuma lugar prome cu e festival cuminsa. Wak e lista di participante aki.