Sizzu di Ocean Z: Mi no kier a haci clandestino manera e otronan

ORANJESTAD – Pa mas di 20 aña e ta conoci na Aruba como un icono di moda internacional. Radiante, poderoso y admira pa hopi. Sinembargo diabierna merdia por a mira un Eva Sizzu (61) diferente, tristo, desapunta y hopi emocional. Sizzu den un tempo corto, a bira e centro di atencion den un situacion negativo, cu e no ta compronde pakico. Un idea pa tin un cas unda cu e kier pasa su ultimo añanan di bida, awe ta e centro di un problema legal, cu por cost'e miyones si e sigui cu su plannan. Sizzu a conta su banda di medaya pa prome biaha y enfrenta un grupo di prensa diabierna merdia. “Awor mi ta cla pa bin dilanti. Prome no.” Di un idea pa tin su cas grandi, y convirti'e den un hotel chikito luhoso, Sizzu a splica cu e ta mira su soño poco poco desaparece.

DUELE

Loke mas ta duel Sizzu den e asunto aki, ta cu el a keda sorprendi cu su ‘amigonan y ex abogado’ a bin cu un critica negativo. “ Nan no a bin papia cu'mi. Nan no a invita mi pa un reunion. Mi ta kere cu mi mester tabata invita,” Sizzu a bisa. E hecho cu el a opta pa pone un nomber di hotel asina grandi dilanti porta no ta importante. “ Ta irelevante pa pone un nomber di hotel dilanti porta. No kier a haci algo clandestino, manera e otronan. Mi lo a mantene e plan original di tin un cas,” Sizzu a sigui bisa.

EMOCIONAL

Indicando cu e no tabata na altura di e situacion rond di dje, e la mustra cu e no tabata sa cu tur e otronan (propiedad cu tabata huur camber) no tin permiso, etc. “ Si mi tabata sa esey, mi lo no a haci loke ami a haci durante e ultimo dos lunanan. Mi a perde hopi placa, mi no por a habri e hotel. Mi ta un inversionista di 20 aña. Mi no ta merece esaki sosode,” Sizzu a sigui bisa. “ Mi ta un inversionista. Mi ta hopi emocional den e caso aki. Mi a compronde cu e permiso ta firma, mi ta wardando riba esaki. Mi ta hopi tristo y mi ta spera cu nos por yega na un bon fin,” Sizzu a sigui bisa. E ta conciente cu ningun negoshi bo no ta haci si no ta pa placa. Pero tambe mi ta haci'e pa Aruba. Sizzu tambe no a sconde su desapunto pa e forma con el a wordo cubri den prensa. “ Mi ta hopi sorprendi con cierto medionan di prensa, a skirbi cosnan cu no ta cuadra. Mi no ta haci nada ilegal. Mi tin 61 aña, mi tabata semper exitoso. Mi no a papia prome, pasobra mi no tabata prepara. Awor mi ta prepara,” Sizzu a ripiti.

CON LEU KIER BAY

Riba e pregunta di NoticiaCla.com con leu Sizzu ta dispuesto pa bay, e la mustra cu tin tres abogado trahando riba e caso y tin posibilidad pa apela e sentencia. “Tin un diferencia di opinion riba e cambio di destinacion. No tin un ley riba forza retroactivo. Nos no conoce esey. No por cobra e boet cu forsa retroactivo,” Croes a asisti Sizzu den su comentario, indicando cu e no ta kere, cu nan lo wordo forsa pa paga cualkier multa, pasobra nan lo ‘supuestamente’ viola un sentencia.