Ocean Z: No por cambia algo cu a wordo duna caba

PALMBEACH – E doñonan di Ocean Z Boutique hotel acesora pa nan abogado, a kibra nan silencio diabierna merdia riba e situacion cu nan a haya nan aden e ultimo simannan aki cu Ocean Z; Un hotel nobo cu nan no por opera ainda y contra cual tin un veredicto cu ta mara nan na man y pia. Y for di un tour relampago duna, por nota cu e hotel no ta cualkier hotel, sino uno cu tur luho y detaye. Durante un conferencia hopi anticipa, nan a splica cu nan no a dicidi ainda, si nan ta apela e sentencia cu ta prohibinan di opera nan hotel y ta evaluando tur posibel paso. Den un conferencia di prensa hopi anticipa, partidonan a mas bien splica nan banda, unda cu nan a plantea e situacion den forma cu nan ta esnan cu a sali perhudica di e deal aki. De hecho, nan a mustra cu segun nan, tur cos ta mustra cu si mester busca un fayo esaki ta cerca otro hende y no cerca nan. Cu mapa na man, y un map yen di carta y documento, abogado Joselin Croes a purba convence cu su cliente no a haci nada robez. Sigur no si mira kico tabata pasando rond di nan constantemente.

IDEA INICIAL

E loke a cuminsa algun aña pasa como un ‘simpel' compra y benta di un cas y propiedad. Un idea inicial di traha un cas grandi pa un famia grandi, a bira un cambio di proyecto, unda cu nan lo kier a cuminsa e operacion di huur camber na turista contra un prijs basta caro, tipo 'upscale'. Un practica normal den nan bario, ya cu varios (y nan a mustra cu nan tin tur documento pa prueba cuanto facilidad ta opera sin permiso necesario) propiedad ta haci esaki caba. Abogado Croes a mustra cu nan kier a bay e forma legal, pa no haya problema. De hecho, mustra un mapa unda cu varios cas riba e strip ta huur apartamento estilo bed and breakfast, den e ultimo dos pa tres aña. Segun e abogado, nunca Preserva Malmok tabatin un keho contra e operacion aki. “Ocean Z tambe ta duna mesun servicio, solamente 100 mil biaha mas luhoso.”

PROCESO DI PERMISO

A cuminsa cu e proceso pa permiso, y a cana e caminda di cruz pa logra esaki.” Nunca den tur tempo ningun hende a haya indicacion di ta contra e proyecto.”  E no tabata un secreto publico segun e abogado Joselin Croes. A cuminsa promove e boutique hotel riba e.o. facebook. Sorpresa tabata grandi ora cu a haya carta di e grupo cu tabata contra (Preserva Malmok), y cu ta pidi pa ‘no haci esaki, sino lo busca derecho legal’. Algo cu a resulta den un hecho tambe despues. E grupo a haya siguransa cu lo no tin ningun ruido, ningun fiesta, sino solamente huurmento di camber pues ningun problema. “No a ricibi contesta, sino a opta pa bay corte,” e abogado a sigui bisa. Durante e caso tabatin hopi peticion di e grupo di Preserva Malmok.

SENTENCIA Y SU EFECTO

Riba esey a bin un 'tussen vonnis', pero entretanto proceso a sigui cana su caminda. Prome cu e 'vonnis' final, a resulta cu e tereno a wordo traspasa di uno di residencia pa uno comercial. Segun e abogado, e sentencia ta bisa cu no por opera te ora cu e compania tin e permiso den nan man.“Ta keda na pais Aruba si ta duna e permiso y no tin indicacion cu no ta bay haya esaki,” Segun Croes, e doñonan ta warda pa esaki wordo duna, pa por cuminsa cu nan operacion finalmente. Finalmente, segun e abogado, nan interpretacion ta cu ta Gobierno a duna nan e cambio di destinacion prome cu e vonnis.  "Opinion ta cu e cambio di destinacion, a wordo duna y como tal no por cambia algo cu a wordo duna caba. Ta keda na Gobierno kico nan pensamento riba esaki ta,” Croes a sigui bisa.