Awe nochi Venezuela ta ‘revela’ conspiracion contra Carvajal

ORANJESTAD – Awe nochi na television venezolano, presidente di e asamblea general di Venezuela Diosdado Cabello ta bay revela 'parti' di e conspiracion cu tabatin contra diplomatico Hugo Carvajal cu a keda libera diadomingo ultimo na Aruba. No a bisa exactamente kico lo por spera, pero si cu ta trata di informacion cu nan a ricibi y lo presenta esaki na e pueblo via television diahuebs anochi. Presidente venezolano Nicolas Maduro a anuncia esaki y bisa ademas cu a sigura cu ‘Carvajal tabata den su cel na Aruba, listo pa enfrenta loke e mester a enfrenta pa defende e dignidad di Venezuela. E lo no a dobla nunca”. Maduro ta considera e desesperacion di e ‘imperio’ (Merca).(wak e discurso di presidente venezolano)

Loke segun Maduro, Cabello lo revela ta ‘parti di e montahe di e emboscada cu a wordo ehecuta cu Carvajal”. Segun Maduro, tabata pa mancha tur cos supuestamente malo na Venezuela y tambe pa chantagea mando militar venezolano. “O nan ta cede y uni na e conspiracion of nos ta hiba nan pa corte di e imperio (mericano)” Maduro a bisa di e mericanonan. Segun Maduro esey tabata nan a amenaza. “Ningun hende ni nada por chantagea nos” Maduro a sigura durante un discurso na television.

E president di Venezuela ta sigura cu e pais a logra un victoria grandi politico y moral pa paz di e pais y continente y e respet internacional. A felicita Aruba, Bonaire y Corsou pa compronde e situacion y a actua prudente y a gradici nan pa respeta e derecho di Venezuela pa por biba den pas como bon bisiña. Tambe a felicita Hulanda, cu a combersa cu transparencia cu Venezuela y cu a emiti un comunicado oficial cu ta haci historia. Aki ta reconoci cu relato preciso, cu tabatin un fayo diplomatico y a rectifica e situacion.