KNVB dispuesto sigui pa yuda Aruba pa drecha su futbol

ORANJESTAD – E bondnan di futbol di Surnam, Aruba, Bonaire y Corsou lo por bati na porta e proximo añanan pa ayudo di e organisacion di futbol Hulandes, KNVB. Tur e paisnan aki tin un acuerdo di cooperacion cu e bond Hulandes caba, y si ta pa e bond Hulandes lo tin interes pa extende e acuerdo aki pa largo tempo.

DELEGACION DI BISHITA

Un delegacion di KNVB e dianan aki ta di bishita na Surnam, Aruba, Bonaire y Corsou . “E bondnan di Surnam y islanan ABC a haci un impresion ambicioso riba nos y nos ta mira cu futbol ta echt biba (eynan),” e director di KNVB Bert van Oostven a bisa riba e website di e bond Hulandes. Loke falta ta bon kader y infrastructura, y cu e bond Hulandes kier mira con pa remedia esaki. “Nan por conta cu nos.”